絲絲講場：港物價七級跳 全球第二貴

經濟學人智庫剛剛公布調查，舊年全球物價最貴嘅地方係新加坡，而香港同蘇黎世就齊齊做亞軍，再到日內瓦。

星洲買車貴紐約6倍

新加坡已經係連續三年Keep住最貴，不過香港今次就係「大躍進」，一跳7級上到第二位；但點跳都唔夠紐約與洛杉磯跳得勁，分別跳升15級同19級（睇下面個表）。呢兩個美國城市咁飛躍，皆因美元強；至於香港，由於港元同美元掛鈎，好難唔畀人鈎住上。

呢個調查，比較咗各地約160種產品與服務嘅一籃子價格而計出嚟。其中一樣睇到新加坡貴嘅係，當地置一輛家庭車要成過百萬，喺紐約只需要17萬！

歐元弱 僅巴黎入十大

不過講到一條「中價」嘅返工裙，喺新加坡竟然要4,300蚊港紙，竟然貴過巴黎！巴黎只係1,900蚊。但都仲未夠倫敦貴，要成7,800蚊！嗱，唔好問絲絲咩叫「中價」，絲絲平時唔係着開返工裙，所以都唔係好知囉。

睇到呢度，若閣下夠眼利，大概已經發覺到－－歐元區只得一個地方入到十大，就係巴黎。點解咁少歐元區入到圍？之唔係因為歐元舊年弱囉。至於瑞士兩個城市蘇黎世同日內瓦，雖則一樣係歐洲，但就唔單止升級（分別跳兩級同3級），兼可以排到頭幾位，就係因為瑞士央行舊年一月忽然撤銷瑞郎兌歐元匯率限制，得「脫歐」帶挈，瑞郎咪強起上嚟囉。

不過，喺巴黎生活，仍然貴過晒其他歐元區地方，但有兩樣嘢就除外，就係巴黎嘅煙同酒都仲係相當划算。若然你齋煙同埋酒就可以過活，不妨諗諗去巴黎。（絲絲提提你：吸煙同過量飲酒會危害身體健康！）

余絲韻