Market Insight：券商股最壞時刻已過

隔晚華爾街三大指數均錄得百分之二以上升幅，是近月最強紀錄。股裂一開波港口開高381點以19,788點開出，由頭升到尾，撐到破埋二萬點關口，收20,003點升596點。要注意，同近日一彈即散的市況最大分別係，成交由長期六百餘億浮沉，激增至926億元，可見願意在破位高追的基金的確唔少。

近排見啲基金經理調查，都已經話普遍手頭現金比例輾轉升至海嘯後新高。要知股市永遠是少數人睇啱，多數人睇錯的英雄地，企喺口淡淡芬佬一面，就注定無運行食唔正今趟反彈浪。以逆向思維去諗，前日中國官方及財新的製造業PMI，統統比街外預期差，可以話衰到無朋友，個市居然都唔跌，昨日連評級都被降，乜壞消息都出晒，唔挾到九彩有鬼。

內房股可部署換貨

昨日最感意外係舊年畀政策市玩到謝一謝，居然仲有人賭兩會概念，死到唔死的煤炭、水泥同鋼鐵股升到爆。阿爺雖然話要全力由供應層面着手，去產能、去庫存拯救有關產業，但要救幾耐？肯定唔會一年半載見到效果。中國鋼鐵業佔全球總產量超過五成，要減產是談何容易。

在國企複雜利益關係，同時要面對大量低技術工人被下崗，「殭屍企業」大遣散潮，引發社會不穩的考量，產業要治本進行結構轉型，可以話綁手綁腳，純粹賭股市今浪小陽春，揀勝算較高的，都係搵番已見效果，在寬鬆貨幣政策下被托起，而經營者又通街平錢可借的行業，即房地產市場。

昨日見就連航空母艦級別的華潤置地（01109）都炒到二三線一樣，狂升6.6%。早排有聽古勝講上咗車，趁住個勢，少少地減磅換貨落去二線少少的內房，越秀地產（00123）、世茂房地產（00813）及雅居樂（03383）都可以諗諗。

唔知同四環醫藥（00460）早幾日復牌狂瀉，芬佬猶有餘悸有冇關係，醫藥股在兩會前夕普遍靜局。全國政協經已將深化醫藥衞生體制改革放入重點議題，當中久聞樓梯的推動中醫藥發展，預料亦有更多政策細節出台，偏偏就唔見醫藥股有鑊氣。既然個市轉以愈殘愈愛的新玩法，錯過咗昨日爆升的兩會概念股，不如搵啲未起步的醫藥股等運到。

中國中藥小注一試

對內地中醫藥的規劃，國務院有晒時間表，望二○年推動中醫藥佔整個醫藥產值三成以上，當中又以中藥顆粒生意比較易睇。中國乜都有假，但性命攸關，中藥顆粒生意一直受國家嚴格監管。

至今得六個經營牌照分別由五間公司持有，兩間香港上市，分別係培力（01498）及中國中藥（00570），前者貨疏且上市無耐，去年業績受上市費用影響。中國中藥市值較大，較啱基金胃口外，舊年上半年業績對辦，已連番測試4元樓下支持唔錯，完全未炒過，敲冷可睇睇。

中港股市全面做好，各個板塊幾乎無一落空，股市上升，最有利的是券商股和保險股，昨日內地兩市成交重上6,134億元人仔，而兩融餘額則創一年新低之8,483億元人仔，兩融風險已大為降低。

早前券商股風聲鶴唳，甚至一些管理層遭中證監調查，但現時風波已告平息，有助股價回穩。雖然A股風光不再，今年可能只在區間上落，滬綜指在3,000點附近已面臨不小阻力，更遑論券商要升至4,500點才可望沽售手上股票。券商一、二月佣金處於「食穀種」階段，但期望三月可以回升，而新股陸續放行，亦有助IPO收入，今年一、二月的最壞時刻相信已過。

光控值得望多兩眼

昨日券商股升得最勁的為廣發証券（01776），升幅達7.7%；惟光大控股（00165）升7.46%亦表現相當，其股價相對較為平穩，除持有光大証券（601788.SH）權益之外，旗下多個基金投資一級及二級市場。

集團每股資產淨值超過20元，現價存25%折讓。早前與母公司合資買下大新金融中心作長期投資，雖然買商廈並不是高回報投資，與發掘具潛質企業的創投投資冇得比，但辦公室除自用外可出租，光控亦只佔16.67%股權，相對其市值及資產值佔比甚低，股價弱勢反應過甚。

古勝