絲絲講場:仙股升仙13年漲1000倍

有隻仙股公司,由○三年起年年賺,到依家賺足十三年,股價升咗1,085倍;間公司未來五年收益,仲預計每年增多20%!咁神嘅仙股,去邊度搵?

印度農藥企 發達靠專利

答案係印度,間公司叫PI Industries Ltd.,係間印度上市農藥公司。○二年尾時只係隻股價0.53盧比(即0.06港元)嘅仙股,到尋日每股已經係573盧比(即65港元)!

點解咁勁?事關佢哋唔掂啲A貨農藥,反而專同啲國際巨企合作開發啲有專利嘅專門產品。六個字講晒:注重知識產權。

余絲韻