絲絲講場：獨角獸網企工時「超晒班」
彈性嘅上班時間、唔使急住去拍卡、舒適嘅辦公環境，以上都係香港唔少打工仔嘅夢想。
但一項調查搵咗37間內地知名獨角獸科網企業，絕大部分嘅獨角獸企業都係嚟自北京、上海呢類一線城市。公司都畀員工更自由嘅上班權限，仲希望寬鬆嘅環境可以激發佢哋嘅創意。
環境雖輕鬆 晚上10點放工
但係得出嚟嘅結果真係估佢唔到，工作環境雖然輕鬆，但呢類科網企業熬夜加班嘅情況反而更嚴重。一般人都知，城市人放工大概5、6點，至於科網企業要加班就梗O架喇，但獨角獸企業嘅情況仲嚴重，8點半放工嘅有35%以上，絕大部分嘅員工成9點半到10點先有得放工。
講咗咁耐，究竟邊間獨角獸公司係「加班之最」呢？就係第三方消費點評網站——大眾點評，仲壓倒手機一哥嘅小米添。過去一年佢哋嘅業務發展迅速，買電影票、推電子優惠券等樣樣做齊，真係唔忙都假啦！
除咗大眾點評，榜上有名嘅仲有電貿母嬰品牌「蜜芽」、手機購物平台「口袋購物」，同埋社交電商「蘑菇街」。喺科網發展迅速嘅年代下，為電商帶嚟更多商機，加班都係值得嘅，絲絲要畀個Like佢哋呀！
余絲韻