絲絲講場：輪后葉文炘再戰「缸」湖
自從大和窩輪部門上年「執笠」，前大和「輪后」葉文炘（Abbie）亦已經喺媒體上絕迹半年有多。不過，粉絲們好快又可以見到佢為大家分析輪證喇，因為絲絲收到風佢已加盟咗瑞信，做瑞信香港認股證及牛熊證部門嘅「銷售經理」。
瑞信睇重長線發展
而絲絲亦搵到Abbie，佢話加盟咗瑞信約一個月，好開心繼續喺衍生工具方面工作，運用過往讀書同做嘢時學到嘅知識同經驗。Abbie同絲絲強調，佢都要經過多輪面試同篩選，事前做足準備工夫，操到十足十，最後先至加入到瑞信呀！
家陣輪證市場唔係收縮緊咩？瑞信竟然會逆市增聘人手？瑞信香港認股證及牛熊證銷售主管何啟聰（Ivan）話，依家佢哋同排名前列嘅發行商相比，人手係較少嘅；同埋招聘喺上年年尾已經開始，瑞信着重長線業務發展，唔會受短線嘅市場波動影響。佢仲話Abbie加入後，將會增加喺媒體上嘅曝光率添。
「輪后」愈來愈少
數數手指，近年輪商實在好難賺錢，淡出嘅淡出、摺埋嘅摺埋，花旗、荷合、渣打、蘇皇、美林等窩輪業務都已一一「倒下」，加上唔少輪后以私人原因離職，令輪后愈嚟愈少。好似前法巴趙海珠（已結婚相夫教子）、前荷合陳芊如（之前叫做陳佩雯）、前滙豐許佩琪等等，都先後離開輪場，令粉絲們傷透心。絲絲心諗，唔知呢班姊妹，唔知仲有冇機會重返輪場，再會知音呢！
余絲韻