絲絲講場：歐達禮爬舊波士頭

沈聯濤曾掌證監7年

話說兩人以前係上司同下屬關係，沈聯濤九八年做證監會主席，直至○五年離任，係歷來坐得最耐主席。歐達禮○一至○四年出任證監會企業融資部執行董事，所以歐達禮介紹沈聯濤時，話佢係自己15年前波士，就係咁解。

15年，人事變遷的確可以好大。沈聯濤冇做證監會主席後，做咗中銀監首席顧問，近年喺香港專職做學者做研究工作，依家係香港大學亞洲環球研究所特聘傑出研究員。

至於歐達禮，一一年重返證監會後更上一層樓做咗行政總裁；喺國際層面，更加步步高陞。話說佢喺國際證監會組織（IOSCO）銜頭愈坐愈高。IOSCO係各地證券監管機構進行國際性合作嘅重要組織，亦係公認嘅證券業國際標準釐定機構。

歐達禮兼IOSCO副主席

歐達禮之前係IOSCO屬下亞太區委員會（APRC）主席，代表亞洲市場爭取更多話語權，到去年十二月更升呢獲選為IOSCO理事會副主席。

絲絲記得，沈聯濤以往係IOSCO技術委員會主席。就咁嘅，技術委員會都好威，由負責監管全球規模最大國際化市場嘅15家監管機構組成。都係嗰句，15年，人事變遷可以好大，唔知15年後絲絲喺邊呢可。

余絲韻