雖然喺香港，債券唔夠股票咁深入民心，但其實選擇多多，投資渠道都唔少（口架）！
債券基金入場門檻最親民，一般只需1,000美元（約7,800港元），且部分中至長期回報都算飲得杯落。以港元債嚟講，恒生香港債券基金一年回報4.25%，三年及五年年度化回報分別有3.22%及4.61%；而首域環球傘子基金-首域港元債券3同期回報分別是4.85%、2.36%及3.07%，回報相當穩健。
但投資基金有度衰，一般要畀2%至5%認購費，當係1萬蚊本金，一嚟就被吸走200至500蚊，但如果係長線投資，認購費就濕濕碎。
如果手頭充裕，大可選擇直接投資企業債，只要揸到到期日，公司又無違約，期間就可以避開加息風險嘅影響。市面上，唔少銀行及券商等金融機構都有提供債券認購服務，一般入場費係100萬港元或10萬美元（約78萬港元）。藍籌企業係穩陣之選，中電（00002）、新地（00016）等，債息有3至5厘。
市場上不乏高息內房債，部分債息更超過十厘，然而，若希望將違約風險減低，金融企業債或者係好選擇，中信銀行二○年到期債券，債息亦近7厘，頗為吸引；而點心債當中，國信證券一七年到期債券，債息逾6厘。