孖妹Ｓ檔案：棄股從債 風險解構

W：資深財資市場人士陳鳳翔（Wilson）

Kitty：我班姊妹最近學人話要「棄股從債」，究竟玩股同玩債有乜唔同？

W：喺投資債券之前，首先要考慮有幾多本（金），因為股票一千、幾百蚊都已經有得入場，但債券就小額係冇得做，除咗迷你債券之外。若真係想小本做，惟有揀債券基金，況且債券同股票唔同之處係，股票隨時都可以賣出，但債券二手市場涉流動性問題，到期前賣出時嘅價差或會好闊，導致投資心態完全唔同。

彩兒：債價有時幾波動，有乜因素令佢發上發落？

W：債券價格走勢主要取決於發債機構會唔會唔還錢，視乎發行人嘅實力，如果股票唔還錢就等於公司倒閉，投資期間你係可以隨時出貨（若不停牌），但債券原則上嚟講，佢（發債機構）一倒閉，你基本上乜都冇，當然佢冇倒閉，到期後就一定可收番本金。債券發行價多以100美元起步，即使隻債喺二手市場有波動，跌低過100美元呢個水位，發債機構喺到期時亦會以100美元價位收番隻債。

險企銀行債易受波及

另一方面，視乎發債體信譽會唔會轉壞，令價格下跌，再者，亦要視乎回報，而投資債券與存款存在替代，做定存時可以到期再做過，喺加息期有優勢，相對買債券就係已經鎖定咗，若市場加息，債券價格就會下跌，但到期時先取回本金，便不涉及期間債價的波動問題。

Kitty：今年資產市場多數無運行，債券可獨善其身咩？

W：今年較特別嘅係油價低迷，或有油公司還唔到債。受累油價下滑，截至去年底，美國已有42家頁岩氣公司宣布破產，仲要未計今年添！佢哋破產咪等於佢發行嘅債係基本上拎唔番錢。

油公司唔掂，其實會引發骨牌效應，好似漣漪咁擴散，例如有保險公司對油公司做投資，除咗保險公司股價會下滑，連佢債價都會受拖累；銀行貸款畀呢類公司導致業績唔好，都會影響銀行債價，主因債價組成主要係同期國庫債券嘅回報率，再加上信貸風險評價等有關，如果企業信貸質素愈差，息率就會愈高。

日本部分長債進入負利率，買入相關債券根本冇回報；而美國方面，上周聯儲局主席耶倫就講，美國因應法制問題暫時無法推行負利率，不過一旦相關問題解決，而又決定實行負利率的話，咁美國債都出現同樣情況，個世界就會好混亂。

彩兒：其實近月我哋都好攰，有啲厭倦揸鑊鏟炒股嘅生活，想入門玩債券，你點睇？

W：咁先決因素係個人對債券觀點係點，事實上，喺加息環境，債券唔係最適合嘅投資工具，但如果係覺得美國未必成功再加息嘅，咁就有得諗啦！第二，對普羅大眾投資者嚟講，債券入場門檻頗高，亦可以通過債券基金做投資，高回報債券基金主力投資質素差嘅債券，風險較高；而選擇主力投資高評級債嘅基金，回報自然低。

國債回報低或輸通脹

另亦要考慮匯率風險、流動性風險，而港元債嘅選擇唔多，相反美元債嘅投資類別多啲，如果係對聯繫匯率信心強，港元或美元均可。事實上，香港人往往投資都係以股票為主，而債券投資可作為長線投資，不合短炒，性質較適合用嚟分散投資組合風險。

Kitty：喺債市作為「小學雞」嘅我哋，係咪應該由國債呢類低風險產品起步呢？

W：普羅大眾買國債安全度極高，但個人投資者承受嘅風險能力係較強，唔同國家，甚至乎係保險公司嘅安全要求咁高，所以國家主權評級嘅債券往往唔係佢哋首選，因回報極低，長線持有或跑輸通脹，所以建議搵相對健康嘅企業債，一般有3至5厘回報率，年期多數係3至5年不等。

人民幣點心債普遍息口仲算幾高，若持有人民幣，而又唔會因匯率下跌而打算轉走，咁值得考慮，雖然100萬元入場，但息口仲高過做人仔定存，境外三年期點心債有5厘；而揀銀行或其他金融機構債券應好安全，金融海嘯後，國際上對銀行要求好嚴謹，雖然銀行好難搵錢，但亦代表佢倒閉機會好微，營運亦變得更健康，而國企倒閉率亦低，值得投資，但謹記留意託管費等服務收費，以免蠶食回報，亦可試同銀行洽商。

Kitty：孖妹嘅認知係債券風險相對股票低，不過○八年出現過雷曼迷債，近期又話憂慮CoCo Bonds（應急可換股債，Contingent Convertible Bonds）爆煲喎，我哋點樣可以避開爆煲風險？

W：呢類債券包含結構性，若拆番出嚟，喺二手市場嘅流動性就更低，視乎設計機構會唔會出嚟接盤，但若冇結構性，擁有較多中間對手，流動性自然較高，所以投資者須了解產品先做投資，如果唔明白結構性嘅特性，當然唔適合掂。但市場上多數零售債券設計都較簡單，風險較低。

若有料報畀彩兒同Kitty或有嘢問，可電郵money.biz@on.cc