絲絲講場：信佳跨界賣寵物產品
呢個世代，叫BB嗰啲其實係囡囡，畀人當正BB嗰啲其實係貓狗，寵物市場潛質大到呢。
就睇Airbnb狗狗版DogVacay（專幫狗狗搵幾日瓦遮頭）早排就已經得到創投泵水三點六億元，連搞狗禮盒（入面當然係啱狗狗食同玩嘅嘢）嘅BarkBox話咁易就有創投掟一點六億元銀彈。
將推電子狗帶餵飼器
難怪連信佳（00912）做開電子產品，依家都搞埋寵物呢瓣。佢哋六月計劃推電子狗帶同電子餵飼器，裝埋個手機App，畀啲狗奴貓奴返工時都可以Check住佢哋嘅「主人」去咗邊、幾時食幾時瞓、跑咗幾多步，度埋營養餐單都仲得。
何止咁，信佳仲搞埋寵物產品網站「Espetsso」，兼出埋佢哋自家品牌嘅Brabanconne狗糧。佢哋主席吳自豪話，外國寵物食品牌子雖然出名，但好似冇考慮過中港同外國生活環境好唔同，所以啲中港寵物過肥。今時今日，唔止奶粉，連狗糧都有本地配方！
吳主席自己都話，傳統淨做電子產品前景一定差，要諗新出路。唔知下一步會否連寵物寄養、獸醫、殮葬都搞埋呢可。
余絲韻