A股昨日高收，但港股卻先升後回，恒指跌近200點收場，萬九點得而復失，國企亦失守八千關。呢期環球股市都係你睇我、我睇你，未有足夠力量支持單一市場異軍突。
繼八部委聯合發文要求加大金融支持工業力度後，發改委亦強調傳統行業去產能的同時，不會引發失業潮。
事實上，就業市場穩定是社會穩定的重要基石，在處理產能過剩問題上，如何既去產能而能保住工人飯碗？在新經濟創造更多新職位取而代之是其中一個辦法，但這絕對是知易行難，所以話，中國問題真係一啲都唔簡單！
有評級公司話，中國評級有壓力，睇嚟外資要做空中國，實行大合奏出口術。慶幸今天中國市場尚未完全開放，真係有大危機，最多落閘控制場面，即使略為推遲改革步伐，亦在所不惜。
講番個股，周初提及的華能新能源（00958）再升12%，表現令人喜出望外。至於昨日推介的中海物業（02669）回吐2.2%，總之失守0.8元就沽之哉。
今日就睇睇隻統一企業（00220），昨日一度高見5.32元，收報5.13元，逆市升0.59%，公司將於下月十八日宣布末期業績。
統一去年中期業績大有改善，純利同比增長93%至6.86億元人民幣，估計相對前年全年純利2.85億元人民幣，去年度業績唔會差，難怪近月吸引多家大行關注，其中大和同高盛都將其評級調升至買入，美銀美林雖下調其目標價至6.5元，但評級維持買入。
若短線大市再現波動，此股跌至5元邊或樓下，可考慮人棄我取。以一六年度預測市盈率24倍計，合理價睇6元。
司慕渢