絲絲講場：股市淡財子高唱《沉默是金》
證券商協會日前新春團拜晚宴，由協會新任主席、英皇證券董事總經理楊玳詩（Daisy）做東，唔少財經界前輩好似中潤證券主席蔡陳葆心都有現身，席間仲有金利豐證券研究部執行董事黃德几（Dickie）同耀才證券市務總監郭思治（郭Sir）呢兩大證券界歌王大展歌喉，不知幾咁熱鬧。
黃德几郭思治團拜鬥歌喉
有「財經界黎明」之稱嘅黃德几話，喺證券界自己認唱歌第三、郭Sir認第二，都應該唔會有人敢認第一；喺依家咁嘅市況，兩個人實行憑歌寄意，合唱一曲《沉默是金》，唱出咗唔少證券界人士今年以來嘅心聲。
黃德几話新任主席Daisy「又能幹、又靚、又後生」，佢仲講笑話自己冇諗住轉工，所以唔使讚咁多喇。佢又話證券商協會呢兩任主席都係女性，女性嘅社會地位真係愈來愈高咁話。
余絲韻