絲絲講場：10財星教你至叻投資

1.正八集團主席廖偉麟 - 買高達與紅酒

佢同舅父湯文亮一齊管理紀惠時，人人知佢投資商廈及舖位有道，不過佢至引以為傲嘅投資唔關樓事，而係高達。佢12歲時一口氣買40盒高達模型，入貨價每盒20蚊，砌完上埋色，每個300蚊賣畀同學！

廖偉麟	林一鳴	王國龍

近啲嘅？有。兩年前佢用280萬元，買入約4,000支法國波爾多紅酒，依家升值五至七成。不過批酒畀佢自己飲咗一半，尚餘嘅佢又話未必捨得賣。

2.生活品味專家兼企業教練Lewis Howes - 投資喺自己身上

佢亦係理財書《The School of Greatness》作者，佢話最叻就係投資喺自己身上，事關佢本人就係品牌喎。

3.投資服務公司Wealthfront主席Adam Nash - 買咗部蘋果Quadra 800電腦

佢九三年買咗部蘋果Quadra 800電腦，幾乎用光佢嗰年做軟件工程師實習時份糧，係佢咁大個仔第一次買貴嘢唔靠阿爸阿媽。全靠呢部電腦帶佢入行，先至有20幾年後嘅今日。

4.人生及商業策略導師Tony Robbins - 錢梗係落自己袋先

佢教NLP、理財、商業心理學、做埋真人Show兼出書，座右銘係：一、錢梗係落自己袋先；二、用寫書賺嘅錢再出書吸Fans，提高知名度賺更多錢。

5.美國財經節目《So Money》主持Farnoosh Torabi - 買樓揸足10年

佢人生至叻就係○四年買咗層紐約樓，10年後升值七成。一話放，唔使24小時有人買。

6.資深金融人林一鳴 - 去非洲做義工

佢廿幾年前向銀行請假，「投資」咗3個月時間，去非洲烏干達做義工搞基建設施；呢次令佢對錢冇再咁執着，改變咗人生觀。非洲人貧乏艱苦、戰禍連年，有當地人被地雷炸斷肢，但仍好樂觀時時帶住笑，冇怨天尤人，令佢感動。

7.理財網站創辦人Alexa von Tobel - 一畢業就儲應急基金

佢係LearnVest.com創辦人，至叻係一畢業後開始儲應急基金，就呢筆基金喺經濟低迷時創立LearnVest，個網站之後得埋獎。

8.領展行政總裁王國龍 - 讀本好書

佢話讀好書係人生最佳投資，領會最深嘅書係Erik Weihenmayer所著《Touch the Top of the World》。作者青少年時失明，但排除萬難登上珠穆朗瑪峰。王國龍話作者以生命帶出，有足夠操練與準備加埋團隊扶持，就人定勝天，冇嘢做唔到。

9.暢銷理財書作家David Bach - 用5,000蚊美金創業

佢至醒就係用5千蚊美金（即3.87萬港元）搞佢嘅理財教育網站事業FinishRich Media，當年佢就喺廚房忽發奇想要教婦女理財，於是寫咗本《Smart Women Finish Rich》（1999）。之後正式搞公司，全美巡迴講座，兼做埋電視節目。依家出到第12本書，賣通50個國家。

10.六福主席黃偉常 - 揀啱時間入內地市場

佢話自己至成功係揀啱時間（九四年）將珠寶生意打入內地市場，當時內地貿易開放，食正天時地利人和，到今時今日分店開到千幾間。

余絲韻