孖妹S檔案:財星團拜全方位畀料

港股喺農曆新年假期後兩個交易日就跌近千點,喺經濟放緩嘅陰霾下,睇嚟今年都幾難捱。不過,孖妹八到一班財星春節約咗出嚟團拜,仲傾得鬼咁開心,唔通佢哋有咩辦法應對呢個股市寒冬?我哋梗係去現場傾埋一份啦,聽吓佢哋有乜私密賺錢錦囊!

話晒係金融圈智囊團拜,佢哋一埋位除咗互相祝賀之外,好自然就講起咁動盪嘅金融市場!孖妹有幸參與其中,不但要問,仲要聽實大家嘅對話,乘機收風!

連:AMTD證券及資產管理業務總經理 連敬涵(Kingston)

港股平但忌盲掃貨

彩兒:舊年我喺股場飽經風霜,踏入猴年,個市會唔會有番啲生氣呀?

連:今年我對股市係完全冇展望,冇希望!

Kitty:新年流流使唔使灰到咁呀?!

連:有好多負面因素依家仲喺度,包括人民幣貶值、中國經濟增長持續放緩、美國有機會繼續加息同油價仲有機會再跌,除非呢四個主要因素有改善,否則個市都仲會繼續調整,未見底住,所以我會睇得比較淡。

公用股債券等收息

Kitty:但啲人成日都話港股平,好抵買喎。

連:依家港股估值算係平,但係究竟會唔會再平啲呢?平又點,唔一定會係升。你話港股市盈率低有少少誤導,因為入面有唔少中資股份,計番佢哋未來業績嘅倒退,市盈率、市帳率係有機會升番上去。依家盡量唔好買股票喇,買股票會輸錢,都係投資債券好過,債券始終有啲穩定收入。

彩兒:有冇啲股票係抗跌力強,仲買得過o架?

連:如果要搵啲唔輸嘅股票都唔係話冇嘅,公用股啦,有幾隻都應該可以跑贏,例如電能實業(00006)、香港電訊(06823)、長江基建集團(01038),呢啲股穩穩陣陣,又有息派,股價都有得升嘅,要買就買呢啲,好過周圍走來走去。

Kitty:過去一年恒指累跌逾兩成,但電能淨係跌約4%,長江基建逆市升逾兩成,香港電訊前排仲創新高添,真係好似好穩陣喎。

陳:ADS Securities零售銷售總監 陳健豪(Aaron)

炒多兩轉外匯補貼

彩兒:股市炒唔掂,轉戰匯市又會唔會好啲?

陳:黑心啲講,當經濟唔好,個匯市反而會容易啲搵錢,因為多咗人做,外匯可以揸,可以沽,靈活度較大。我舊年股市投資就麻麻哋喇,中長線投資嗰啲藍籌都繼續坐住喺度,我都驚驚哋,或者炒多兩轉外匯補貼吓啦,如果唔係好大鑊。

澳元英鎊有望反彈

Kitty:咁你今年又會點部署?

陳:我同意Kirk講,今年買金係可以,人民幣就唔好掂喇,雖然我自己唔係睇得太淡,但應該升唔到。我覺冇咩邊隻外幣可以睇好,依家唔少外幣有反彈,但應該係處上落市,一季之後計番可能冇咩大變化。

真係要揀可以留意吓澳紙,呢幾年跌咗三成幾,加上澳洲息口走勢比較中性,我覺差唔多可以買入做中長線投資;英國年中會舉行公投,決定離唔離開歐盟,呢個變數令依家少咗人買英鎊,但英國嘅經濟唔差,失業率算低,人工有升幅,若公投結果係英國繼續留喺歐盟,之前英鎊嘅跌幅就會係超賣,有望上番去,所以投資者可以喺年中後留意吓英鎊。不過,始終大方向都係美元轉強,呢兩隻貨幣升幅唔會話非常大,未來兩、三年可能有10%升幅。

葉:惠理基金ETF業務拓展高級副總裁 葉浩文(Kirk)

金價睇1300 看升一成

彩兒:上年個市跌到咁,但聽聞你冇咩損手喎。

葉:上年六月我見到啲股票估值有啲高,減持咗部分,但去到年尾,恒指落番去20,000點嘅時候,都曾經覺得估值吸引撈咗貨,搞到年尾輸咗啲,慶幸年頭有唔錯回報,最尾都算過得去啦。

Kitty:咁你醒番我哋一招半式,去對抗呢個股市寒冬啦!

葉:今年個市都會比較波動,不過年頭到依家最出奇就係黃金表現好好,金價大約升咗16%,跑贏咗大部分主要指數。金價喺去年十月高位,跌番落去十二月嘅低位,主要原因係市場擔心美國加息嘅影響,但上年年底聯儲局落實加息之後,呢個陰影就冇咗,近排市場對三月再加息嘅預期低咗,黃金喺股票同債市咁大波動下,避險作用愈來愈大,市場對黃金嘅需求大咗好多。喺香港,投資黃金可以買實貨金、做期金、紙黃金,或者買黃金ETF。我哋見到過去幾個月ETF嘅成交量大咗好多,金價應該有支持。

分散投資易啲捱過

彩兒:現貨金價由十二月約1,000美元升到去依家突破1,200美元囉喎,你估到底仲有幾多升幅呀?

葉:我覺得仲有5至10%升幅,如果美國經濟繼續唔係咁好,加息速度放慢,今年加唔到息嘅話,其實有機會上番去1,300美元。

彩兒:咁你自己整體嘅資產配置又點做法?

葉:我個人上年比較偏重股票,今年市況咁波動,要盡量分散投資,股票、債券、黃金都持有,咁會容易啲捱過。股票我會揀高息股,因為佢哋通常都係攻守兼備,就算股價跌咗,都有錢返嚟。投資者可以考慮揀番啲高息股ETF(交易所買賣基金),一籃子股份咁買,風險較低,又唔使煩。

何:瑞信香港認股證及牛熊證銷售主管 何啟聰(Ivan)

市波動 衍品睇條款

彩兒:呢排個市閒閒哋一日都跌超過500點,如果想刀仔鋸大樹,炒吓啲輪證博一博又有咩要注意呢?

何:今年大家擔心宏觀經濟環境,喺咁嘅心態下,市況波幅會比以前大,如果買衍生工具,條款選擇變得好重要。由於波幅大咗,你去揀牛熊證,要因應市況選擇適合嘅收回價;揀窩輪要睇番引伸波幅嘅變化,有時個市波幅增加,引伸波幅會跟住升,(令窩輪價格上升),但當市場氣氛緩和咗,引伸波幅就會好快回落,所以揀窩輪最好揀番貼價啲或者中長年期嗰種,注碼方面亦要好好控制。

指數牛熊證料旺場

Kitty:睇嚟都唔係咁易玩喎。

何:我諗投資者今年會比較鍾意指數類嘅產品,因為佢哋較個股容易掌握;個別一啲藍籌、權重股,跌得比較多嘅話,我相信啲投資者會買啲牛證、Call輪博反彈。一月份就見到大量資金流入指數牛熊證,引伸波幅升咗,令指數輪嘅實際槓桿跌咗好多,比較起牛熊證就冇咁吸引。

變身運動健將跑開有條路

四位金融界才子分別嚟自股票、基金、外匯同輪證界別,但就好鬼老友,新年都特登出嚟一齊團拜。經孖妹打探下,發覺原來佢哋個個都係跑步好手,何啟聰仲曾喺一個3公里比賽贏到冠軍,大家係因為呢樣運動而熟起上嚟。

陳健豪話,最初幾個金融界朋友都住東區,咁啱各自去跑步,喺facebook見到大家原來都跑同一條路線,咁就約埋咗一齊跑,跟住個版圖愈擴愈大,依家聚到起碼十個人。佢哋嚟緊三月又會代表金融界參加一個50公里嘅馬拉松接力賽。

若有料報畀彩兒同Kitty或有嘢問,可電郵money.biz@on.cc

Kitty 彩兒