春節假期間，外圍股市顯著下跌，港股國指兩個交易日唔見咗6.8%，斷估今日A股復市，紅盤走低係意料中的發展，跌得少都叫叻！不過，A股往往不能擺脫人為因素，會唔會有意想不到的表現，就要做事後孔明了。
春節過後，內地經濟焦點放在三月上旬召開的兩會身上。此前，國際大鱷同著名對沖基金經理不斷唱衰中國經濟。老實講，眼前內地經濟狀況是近十年八載最差，確是不爭事實，但係咪去到要崩潰地步，就有商榷餘地。
只是最敗筆乃去年官方主導股市「快牛」、之後又粗暴救市，再而今年初搞過熔斷機制結果爛尾，在在顯示內地財金官員在制訂金融政策及處理市場危機方面未夠水平。
畢竟搞政治同搞經濟金融係兩回事，外圍因素變幻莫測，非長官個人意志可左右，最好就廣納多方金融專才意見，從善如流，完善金融政策和機制，否則再行錯多一、兩步，失敗都係咎由自取。
提及兩會，供給側結構改革是焦點之一，宜留意各地如何落實房地產去庫存的措施，另今年是「十三五」的開局之年，且看在政策目標上是否有新猷。往績顯示，凡呢類大型活動前，中資股都有得炒吓，唔知今年咁多新人新事，會唔會有例外！
回說上周兩個交易日，海爾電器（01169）連日裂口低開，上周五低見11.04元，跌8.4%收報11.12元，成交約9,075萬元，兩日累跌15%。
睇番數據，海爾去年首三季綜合純利升一成至18.3億元人民幣，照計人民幣貶值，應有助改善出口業務表現。
早前其母公司與通用電氣簽署合作諒解備忘錄，而海爾集團旗下A股青島海爾（600690.SH）更以54億美元收購通用電氣家電業務，料交易於今年次季完成。雖然其後上交所過問交易估值及整合風險，但照計同香港上市的海爾無大關係。
若然短期未見有其他特別利淡消息，照計海爾股價有反彈條件。觀乎上周五其平均成交價11.53元，反映低位成交佔比唔算太多，只是技術上14日RSI在30，又未到極度超賣地步。若今日沒再裂口低開，可以留意，反彈兩級阻力分別在12元及12.5元，下一個較大的支持在10.4至10.5元。
司慕渢