Market Insight：牛熊重貨區有啟示

上周四、五港股一個弱字已經形容晒，唔少基金經理放年假尚未歸來，加埋A股未復市，中資大戶並無加入戰團，在現貨市場疏落成交下，港股幾乎是一跌到底，即市彈都唔彈。上周五恒指跌226點，一連兩日合計跌咗968點，羊年難捱大家有目共睹，只係估唔到丙申年開局都咁慘。

因為聯儲局主席耶倫在聽證會上出彈弓手，先嚟口硬話年內息要加，隨後轉軚認聯儲局會考慮負利率的可能，美債市多得佢唔少，亂過亂世佳人。

上周四一度出現恐慌買入，周初仲有1.8厘的十年期美債孳息，周四低位殺到落1.526厘，息跌意味債價上升，在主席周五大放鴿詞後，上番去1.74厘，債市似乎已出現一個中短期的轉角市。但利率期貨所見，在歐、日經濟一池死水，中國持續要放水救經濟的環境下，今年底前再加息的機會已是微乎其微。

散戶指標令人憂心

反觀港股，踏入一六年兩個月都未過晒，恒指累積隊咗近3,600點，先嚟一次技術反彈本來合情合理。以上周五港股ADR計落，今日恒指早市斷估會有大約300點反彈，基於基金經理靠邊站，新流入資金唔多，以炒輪散戶作後市指標的話，古勝有少少擔心，即使反彈，未必可以出現連日爆升的局面。

一來，近幾日流入牛熊證比例都相當一面倒，熊證無人吼，牛熊重貨區分布，殺熊無乜肉食，反而插落18,100至18,499點的重貨區，差不多有等同2,500張期指的牛仔可劏，落到17,900至18,099點的話，仲額外有多800幾張，基金風險胃納未好番，現貨成交仍奀豬，你估大戶會唔會眾志成城，炒上去畀班散戶食胡？

新正頭，在下有機會同幾位股壇老前輩拜年，聽到佢哋避過舊年四、五月，大時代之後的港A股大屠殺，可惜卻衰喺年底歐美及跨國大銀行大熊市，CDS溢價暴升的手上。近幾年唔少身家有番咁上下的炒家，見內地經濟立立亂，愈救愈驚，都索性將彈藥投向高息債市場，尤其一些歐洲銀行的永續債券，趁港美拆息夠低，即使只做一倍槓桿，閒閒地可以坐享一成五甚至更高息口回報，固然比起睇住個市，升一日跌三日好。

投資市場難尋樂土

可惜花無百日紅，中國硬着陸憂慮波及全球經濟的說法，愈來愈有捧場客，加埋歐洲難民問題，令央行的寬鬆政策泥牛入海，復甦無期，咪以為淨係股市玩家受苦，歐洲有生意的銀行，CDS溢價無不出現狂抽的情況，仲升到相當誇張，好似上星期已率先出手回購的德銀，一隻票面7.5厘的永續債，年初至今債價帳面已蒸發咗四分之一，就算只係做一倍槓桿，意味數字上揩咗一半，賺息抵唔到蝕價。

睇住近半年，商品唔得，股市謝皮，樓市由牛轉熊，高息及企業債市都岌岌可危，不期然輕嘆一句，到底何處是樂土！

環球市場仍然波動，市場避險情緒升溫，資金流入黃金避險，金價持續走高，金礦股在金價做好帶動下，持續攀升，就連金飾股上周五亦紛紛起動，周大福（01929）逆市升9.44%，六福集團（00590）亦升逾8%，周生生（00116）則升6.07%。

零售股與消費市道息息相關，去年內地旅客訪港人數放緩，金飾股當然亦難幸免，六福截至十二月底止第三季零售業務之銷售表現，整體同店銷售按年倒退25%，較第二季6%跌幅擴大。至於周大福截至去年底止第三季，整體零售值按年減少11%，整體同店銷售則倒退15%，可見金飾股經營環境仍然相當嚴峻。

金飾股短線可睇好

目前，內地訪港旅客仍未有回升迹象，相信金飾股今年仍考驗重重，但受人民幣貶值影響，加上環球金融市場動盪，黃金保值作用重現，料有助刺激銷售回升。此外，金飾股隨着金價的上升，其存貨價值亦隨之上揚，以六福為例，截至去年九月底止，持有存貨66.5億元（主要是金條或金飾），在近日金價持續上升帶動下，估計其存貨價總值亦隨之而上升。

上周五晚在股市及油價回升下，金價回落，預期在避險情緒不斷升溫下，相信金價仍保持上升趨勢，所以繼金礦股之後，金飾股亦是另一選擇，不妨候回吐吸納。

古勝