隔晚油價回軟至30美元樓下，美股又散過，而日股昨低開後愈跌愈有，最終跌逾3%，睇怕負利率都幫唔到佢幾多。反而，滬綜指雖然都係低開，但臨近尾市跌幅收窄，最終僅跌0.3%。
板塊方面，在昨日大弱市底下，基本上接近全軍盡墨，石油相關股因油價重新失守30美元而走軟，昨日「三桶油」跌幅就介乎2.7至4.1%。
從油價中期的大弱勢看來，相關板塊底子確實弱過藥煲，即使短期大市有技術性反彈，石油相關股的彈力料會跑輸大市，故建議大家都係睇少瓣。
再睇睇隻曾逆市升17%的中國鋁業（02600），即市最高見2.84元，但午後升幅收窄，最終升2.8%報2.49元。睇番上升動力源自市傳熱炒工信部副部長辛國斌上周在一六年稀土行業座談會議上提出，要在今年六月底前完成內地全部稀土大集團組建工作，實現以資產為紐帶的實質性重組。目前，已經有中鋁、北方稀土（600111.SH）、廈門鎢業（600549.SH）三家集團完成組建工作。
筆者認為，鑑於現時大市氣氛甚差，「國企改革」四字對相關股份刺激作用不大，故使中鋁股價昨日升勢一瞬即逝。不過，從基本面睇，中鋁又不是全無投資價值，事關中鋁早前已發出盈喜，料去年全年扭虧為盈，淨利潤約2億元人民幣，加上行業近幾年都因市場供求失衡而陷於衰退，若然今後有行業併購消息出台，相信具行業龍頭地位的中鋁仍是利多於弊。
走勢上，中鋁股價自去年下半年已開始調整，近幾個月在2.1元水平守得幾穩，可趁低吸納睇中線。若能候回調至2.2元水平買入，博彈番上2.9元食胡，都有三成潛在利潤。
司慕渢