Market Insight：滿地平貨恐愈撈愈低

常言道：「水能載舟，亦能覆舟」，隔晚美股急跌，主要同油價恐慌性插水有關。石油向來影響全球經濟命脈，正常情況下，低能源價格唔單止有助壓抑通脹，讓貨幣政策有更大靈活性，間接令企業營運及融資成本得以降低。

當眼見近年油價水銀瀉地般愈跌愈有，回望一四年高位107美元，舊年在62美元行人止步，到周二晚30美元都再失守，每年來一次五折酬賓，都咪話唔得人驚。

金融市場亦擔心掛一漏萬，有啲嘢商品市場預見，自己卻睇唔到，結果怕能源企業違約風險增加，支持新經濟的替代能源產業，因為低油價而玩完，最終拖累美股冚包散。

石油供需大失衡

無疑，由後海嘯到一四年中，全球石油市場的供需基本上達致平衡，但當中國經濟失速情況日益明顯，其他新興市場需求遠未達預期，同時間，頁岩油使美國由淨消費變成淨輸出國，俄羅斯也積極出口，加埋不再受國際制裁的伊朗，努力恢復石油輸出，此消彼長，就像平衡的天秤中，把法碼由一端搬到另一端，最終油價同天秤一樣往南走。

近排成個商品市場睇實油組，幾時有緊急會議，望在減產托價方面達到共識。客觀現實，整個海灣國家經濟瀕臨崩潰，試問邊個會肯勒緊褲頭，冒住失去市場佔有率風險？仲未計，從來同沙特無商無量的伊朗，高調宣稱要繼續擴產創匯，各項因素結合，油價會唔會插落20美元邊？在需求未見增而又供應不斷底下，並非不可能也。

股市與貨幣一樣，市場價格多多少少建基於市場信心。在投資者現信心危機，悲觀情緒蓋過一切之下，乜事都可能發生，單係一個平字，絕不足以入市賭身家，以分段形式入市，會是相對安全的做法。唔少人睇實恒指市盈率，幾時插到7.8倍同○八年低位睇齊，等撈底機會，昨日高盛中國策略師大潑冷水，認剔除內銀股成分，依家恒指平均市盈率超過9倍，唔算便宜。

內銀股無謂多手

承如「工農中建」四大內銀PE只係介乎4至5倍，睇落好平，但先唔講不良貸款及撥備周期未見頂，基金經理無藉口說服客仔入市，最重要係盈利見頂，見唔到復甦的低PE股，過三幾年講唔埋隨時變成高PE股，博反彈又嫌佢唔夠力，看官們都係當睇少一瓣把啦。

聯想集團（00992）出第三季成績表，截至去年十二月底止除稅前溢利3.2億美元，好過市場預期，無奈先前兩季失地太多，無法扭轉見紅事實，累計三季蝕3.08億美元，每股虧損2.78美仙，業績對股價的幫助一瞬即逝，插低一成收6.61元。

一四年收購摩托羅拉無線設備技術及IBM伺服器業務，聯想需要時間消化整合，期間業績反覆是預期以內。個人電腦生意是夕陽工業，銷量跌得比預期少，幫助有限，反而較失望是智能手機市場份額未算標青，按年跌1.5個百分點落到5.1%，成績表睇落觀感一般，短期返回7元無望，穿6元機會仲會大啲啲。

汽車股近期仍未脫困，長汽（02333）反彈一日過後再跌，吉利汽車（00175）跌近5%，華晨（01114）更大跌6%創三年半新低，但亦有個別表現不差，廣汽集團（02238）今年以來跌幅不足5%，可謂跑贏大市。集團一月份銷量按年升36%至13萬輛，而SUV銷量更大升1.37倍至5.8萬輛。

廣汽表現勝同業

一月為汽車銷售淡季，廣汽今年的銷售目標估計會有遠高於市場的升幅；集團已發盈喜，料一五年純利將增長20至45%，至38億至46億元人仔，較市場預期為高；以中間價賺42億元人仔計，每股盈利66分，折合一五年市盈率約8.5倍。雖然相對其他估值已大幅下降的同業並不算吸引，但一六年估計有大幅增長，SUV和新能源車將成增長動力。

廣汽在汽車股當中較不受注意，但廣汽豐田和廣汽本田等已有多年歷史，其A股股價更達20.21元人仔，為H股的兩倍多。走勢方面，去年十一月高見7.82元，其後徐徐回落，但近日升破下降軌。長汽剛公布的業績預告亦令人失望，反映銷量增長未必能同步提高盈利，但廣汽下半年的表現卻遠勝於上半年；同是日系的東風（00489）表現亦勝於其他汽車股，反映消費者的口味轉變。

古勝