絲絲講場：卡賓先生戰衣擺明想「玩嘢」
卡賓（02030）尋日業績會，人稱「卡賓先生」嘅主席楊紫明時尚品味獨特，佢尋日出新戰衣，藍底加橙色圖騰西裝，勁！
靈感來自「遊樂場」
卡賓先生話，呢套自家設計戰衣，價值約2,000幾蚊人仔，佢話今季主題靈感來自中環高樓大廈同埋「遊樂場」。佢仲話中國同香港經濟因素令每人都面對唔同嘅壓力，話希望套衫着上身可以畀人積極同愉快嘅感覺。
唔止衫，卡賓先生嘅髮型亦落足料，Gel咗個呢排至潮嘅「比比鳥頭」。
咁卡賓先生有冇考慮一腳踢做埋Model拍廣告？佢答話自己身形唔得，話每人喺各範疇有唔同專長咁話喎。
余絲韻