絲絲講場：原油平過水是喜是悲？

嗱，絲絲係講緊「原油」，唔係香港油站嗰啲車用燃油！車用燃油提煉自原油，喺其他地方兩者價錢未至於天與地，但喺香港就......係呢，唔知點解嘅呢。

平日財經版講緊嘅油價，係講「原油」。油價自從二○一四年中開始跌，之後更加係跳崖咁跌，沒有最低，只有更低。

一桶石油平過條三文魚

尋日紐約期油跌到每桶近30美元，而根據挪威海產業數據，依家一條重4.5kg挪威三文魚約值34美元，即是一桶油平過一條三文魚。

抵過一個Pizza套餐

仲係覺得油價好離身冇乜感覺？嗱，一桶原油30美元計，大概港紙234蚊，即是一桶原油仲平過一個2-3人Pizza套餐、或兩打半罐裝啤酒、或一件Uniqlo有帽衞衣、或一桶580粒經典Lego，就算去連鎖咖啡店飲一周咖啡都貴過桶原油！

咁講取巧？好，絲絲就同你認真啲計。一桶原油約160公升，以每桶30美元計，每公升大概1.46港元。香港便利店啲樽裝水，法國進口貴價嘢唔計，一支普通500毫升樽裝水售價依家大約5.2港元，即是每公升10.4港元。一併之下，See，樽裝水貴過原油高達6倍！

遠輸鮮奶汽水咖啡

以同一容量計，原油除咗平過樽裝水外，亦平過晒鮮奶、汽水、咖啡、紅酒同伏特加（唔信？睇下圖）。可惜原油唔飲得。

余絲韻