孖妹Ｓ檔案：基金箍客靠「財」數
新一年以來個市震唔停，有人估九七年金融危機嘅情況會再次出現，靠炒股賺餐茶錢嘅孖妹都被嚇親，何況係秒秒鐘幾十萬上落嘅基金大客呢，加上國際大鱷索羅斯高調唱空，啲大客即時好肉緊，急急搵自己嘅Fund Man問個明白，孖妹今個星期就決定同兩位基金經理傾吓偈，八吓佢哋點樣幫客戶排解疑難，避免資金被大戶抽走！
依家唔似九七九八
譚：中環資產投資行政總裁 譚新強
彩兒：點解你呢排咁勤力覆Message呀？
譚：內地客對人民幣匯價特別敏感。我收到唔少微信、電郵，問索羅斯要衝擊中國喇，自己應該點部署。
Kitty：索羅斯喎，好多人話九七年亞洲金融風暴都係因佢而起，聽到都驚啦。佢上兩個星期公開話，中國經濟無可避免要硬着陸，依家沽空緊亞洲貨幣，內媒仲要特登出文章話佢挑戰人民幣一定唔會成功。
譚：呢個阿伯固然好叻，但正式嚟講佢已經退咗休，我唔覺得佢有好大嘅陰謀計劃，一面唱淡，一面做空。你講緊人民幣走資問題，唔需要擔心外面邊個大鱷，無論係人行或者金管局擊退佢哋都綽綽有餘啦。要驚就驚中國十三億人個個都想將人民幣兌成美元，依家就有少少咁嘅味道囉。
彩兒：雖則話中國嘅外儲仲有三萬幾億美元，但喺人民幣由高位跌約7%嘅情況下，外儲比高位已跌咗四分之一喇喎，睇到我個心都離一離。
港股料彈 惟欠動力
譚：有人問我依家似唔似九七、九八年亞洲金融風暴，當然唔似啦。嗰時啲亞洲國家爆煲係因經常帳極差，又借咗好多外債，依家中國有大量外儲，外債佔比亦唔高。中國喺咁嘅情況出現貨幣危機其實係一件好奇怪嘅事。內地錯就錯在主動將人民幣貶值，令走資出現。內地人睇人民幣好似睇細價股，見佢跌好多，都覺得佢可再跌，所以人行都係唔好再玩一次過貶值喇。
Kitty：咁你覺得呢場疑似貨幣危機最尾會點收科？
譚：依家冇嘢緊要得過人民幣匯價呢樣嘢，中國可以輸出國外嘅問題就係人民幣貶值，再貶就會進一步觸發貨幣戰，仲會增加全球通縮壓力。中國要改變呢個狀況，一係就成功改變市場對人民幣貶值嘅預期，一係政府放棄托住股市，咁樣A股跌到夠平就會有人去買，啲錢就自然唔會流走，內地亦要製造多啲投資機會畀民企同外資。中國嘅貿易順差咁強，我覺得人民幣唔需要大幅貶值，但會唔會發生就取決於政策思維同執行能力。
彩兒：個市咁差，幫客賺錢都好難。
譚：其實日日都好難（口架）喇，投資係睇前景，前景永遠都係唔清晰。依家特別困難係因為短期波幅增大咗，另一方面全球宏覯經濟衰退或增長減慢緊，做淡永遠難過做好。
彩兒：港股由28,000點一路跌落嚟，去到依家得大約19,000點，究竟會係愈跌愈有，定係就嚟見底？
譚：港股一句講晒係平，最平嘅嘢係有機會反彈，但暫時睇唔到個催化劑。
採套利策略避風浪
Kitty：咁你依家有咩投資部署？
譚：依家現金同債券嘅佔比會多啲。如果做得好嘅債券仍然唔錯，呢個係一個由下而上（Bottom-Up）嘅投資，就算中國經濟差，我都唔信大部分公司會違約，我哋會多揀較短期嘅債券，持有至到期而間公司冇違約，回報都好過現金啦。
另外我哋近一年半載都係多用套利策略，因好難估個市升跌方向，每日波幅亦可以好大，暫時又睇唔清楚政府政策，所以交易最好唔好咁方向性，做得太淡隨時被人夾爆。當市場平靜咗，我哋再去揀股票，會諗吓邊個受惠油價下跌。
展現價值投資風格
馮：長江證券資產管理董事總經理 馮時煖
彩兒：你個電話又響喇喎，啲客搵得你咁急究竟咩事呀？
馮：投資者最擔心都係市況波動，之前佢哋關心啲錢喺我度獲利幾多，近期會想理解多啲個市況點解咁波動，同埋短期會唔會有改善。
Kitty：我都想知呀，個市跌就跌好多，反彈就升得少少，我副身家又冇咁一大截喇。
揸股債 拒Buy And Hold
馮：近期個市比較波動有幾方面原因，市場對聯儲局再加息會有唔同猜測，呢個會左右市場嘅方向，另外冇咩好消息出現，原本期待一啲企業盈利消息支撐大市，但無論香港、內地或美國嘅企業盈利都唔係特別好。市況短期難以改善，嚟緊春節假期嘅企業活動會減少，政策要等到假後先會有明顯方向。
彩兒：年頭個市已經咁波動，唔少人都話揸現金好過，唔使蝕都當贏啦，你又做咗咩部署，以求力保不失之餘，仲可以賺到錢？
馮：我揸股票會做對沖，升嘅時候可以套利，跌亦唔使蝕咁多，仲會增持債券。今年「Buy And Hold」嘅策略就行唔通（口架）喇。投資A股要留意政策有冇利好，當然要人民幣匯率仍有下行壓力，貨幣寬鬆措施應該會延遲推出。港股方面真係要睇基本因素，同埋外圍氣氛，美國加息對港股會有較大影響。依家最大風險或者係美國突如其來加息，同埋人民幣匯價再大幅下跌。
Kitty：你又有咩方法箍住客戶個心，令佢哋唔好咁易畀個市震走？
馮：第一要令人明白你嘅投資風格，我係比較偏向價值投資，會考慮股份嘅GARP（Growth At Reasonable Price），投資香港市場唔可以淨睇市盈率、市帳率，仲要睇吓有冇催化劑，例如係咪有行業周期或者盈利增長配合。
勿偏離客目標太遠
彩兒：即係你偏好搵價值被市場低估、但同時又有穩定增長潛力嘅股份。
馮：我仲會了解客戶風險承受能力同目標，唔好偏離目標太遠，或要佢哋承受太大波動，好在香港市場嘅衍生產品有唔少選擇，可做對沖。
買賣基金宜睇清計法
調整自己的基金組合時涉及認購或贖回基金單位，究竟當中有甚麼程序以及需注意的地方？
若想認購或贖回基金，可在任何交易日，向基金公司或基金銷售商發出指示，現時大多數香港零售基金可每日或最少每星期一日進行交易，且不用繳付贖回費。
基金的認購及贖回價，一般都是以其資產淨值除以已發行單位計算，投資者宜仔細閱讀基金銷售文件披露的計算方法。
御峰理財研究部投資組合經理香敏華指，基金屬長線投資，決定認購或贖回時，除考慮回報外，亦宜留意其波幅、基金經理的往績、基金是否有悠久歷史等，不宜倉卒作出投資決定。
若有料報畀彩兒同Kitty或有嘢問，可電郵money.biz@on.cc
彩兒、Kitty