Market Insight：軟件股唔怕低吸

以往死都唔行負利率政策的日本，似乎見到歐央行、丹麥、瑞士及瑞典都先後使出負利率一招，實行有樣學樣，上周五意外地宣布，把金融機構存放在日央行的超額存款準備金利率，由舊有的0.1厘，降至負0.1厘，換言之，對金融機構未來新增的超額準備金，要徵收「罰款」。

上周五股市反應正面，但古勝認為負利率心理作用大於實際，先唔睇帶頭玩罰息的歐洲，經濟復甦仲係似有還無，啱啱歐央行先暗示可能擴大量寬規模。日本經濟問題，當下並非銀行唔願借，而是企業睇唔到經濟會有起色，提供足夠投資機會，令貸款意欲低。

日通脹目標凍過水

反而，日央行無提擴大資產購置規模，爆冷揀行負利率一條路，畀在下第一印象，是日央行都心知肚明，無咩彈藥再擴大資產負債表規模，假如今次消息都唔夠推冧日圓，至少兌美元返到123至124水平，日本政府一拖再拖，講到要一七年上半年先至可實現的2%通脹目標，睇落真係凍過水。

上周五升市，藍籌中貢獻最多是滙控（00005）及騰訊控股（00700），分別升2.1%及2.3%，俄羅斯有意思同OPEC坐埋傾減產托市，國際油價回穩，藍籌「三桶油」升幅3.5至9.5%，以國際油價敏感度最高的中海油（00883）升得最勁，昆侖能源（00135）都有8.2%進帳。

恒發洋參（00911）掀起細價股斬倉潮序幕，話口未完，上周五輪到大健康國際（02211）出事，由2.39元最低落到0.69元，最深跌約七成，埋單亦要跌59%或1.4元，收0.97元。呢間公司一三年上市，從事保健健康產品銷售，上市咁耐都無咩點炒過，2.91元招股後，大部分時間在3至4元之間上落，舊年大時代谷過一浸上5.58元，爆煲前一日主要股東斥資千萬增持，路邊社消息話因為托唔到按倉價所以出事。

話就話，「沽空中國」成為近排外資高唱的主旋律，講返轉頭，13億人口消費市場，無論一架汽車以至一支小提琴，中國都肯定會係全球最大消費國。

和諧汽車挑戰高位

政府多年大力推動汽車業、汽車下鄉、低排補貼、電動車補貼，中國汽車市場已經連續數年蟬聯全球首位，去年乘用車銷售突破二千萬，市場多年高速增長後，汽車美容、過保養期汽車維修等，對4S專門店服務需求，可見日子只會愈來愈大，尤其經濟麻麻，自掏腰包返原廠保養抑或出外面整，車主自然知道條數點計。

4S生意入門屏障唔高，講得衰啲真係人人都可以開檔，所以揀股真係要小心啲，近排睇中隻專攻貴價豪華車品牌的和諧汽車（03836），見股價比大市更早見底，4元有明顯支持，一六年9倍PE左右，絕非行內最平，但論知名度及股份交投量不俗，而且同阿里巴巴有合作關係，暫時最啱心水係佢，睇短期可唔可以返到接近甚至突破舊年十一月高位6.73元。

大市上周五顯著反彈，軟件股升幅亦相當顯著，其中金山軟件（03888）及金蝶國際（00268）均升逾8%，至於中軟國際（00354）及擎天軟件（01297）分別升逾5%及2%。目前內地正積極推進訊息化發展的政策，包括「互聯網+」行動計劃，鼓勵大數據及雲計算等發展，以配合整體經濟結構轉型，為訊息科技行業帶來空間及發展機遇，由於獲國家全方位支持，因此相信軟件相關股份在大跌過後，有機會率先作出反彈，不妨趁低收集。

金蝶中軟納入名單

為配合國家發展，金蝶亦積極拓展雲服務，雖然「金蝶雲」仍然錄得虧損，但集團未來兩至三年仍會繼續加大投資，以獲取更多用戶及增加市場份額，現時「金蝶雲」佔公司的收入比重約一成，相信隨着業務發展日趨成熟，可為集團帶來可觀的收入。

至於中軟國際是內地大型綜合軟件與資訊企業，提供從諮詢、解決方案、外包服務到人才培養的「端到端」軟件及資訊服務。截至去年六月底止，集團錄得純利1.4億元人民幣，按年升37.9%。目前，集團的業務仍以大中華區為主，國家推出更多政策推動軟件行業發展，相信中軟亦可從中受惠。

古勝