北水頭等倉：聯想缺乏大升條件

上周內銀股有段震撼消息，就係話農業銀行（01288）披露北京分行票據返售業務發生重大風險事件，涉款高達39億元人民幣。

「三桶油」博唔過

據內地報道，該案涉兩名員工，單兩名員工可以竊取銀行幾十億元人民幣票據，內銀的內部監管水平實際令人擔心！

雖則話對比市值，唔見幾十億唔會動搖到農行財務狀況，但類似的事件對存戶同股東都不利，可見內地金融市場，尤其是監管方面仲有好多須要改善的地方，唔搞好自身問題就對外開放，係一個好危險的行為。

展望本周，距農曆新年假期僅餘兩周，相信即使尚有餘震，本周內期指結算前後會完成，下周假期氣氛會明顯轉濃，市況窄幅波動。上周五市況反彈，「三桶油」功不可沒，但國際油價反彈勢頭能否持續，實難猜測，所以唔會建議博油股。

藍籌股中，聯想集團（00992）早在去年五月股價見頂回落，並在八月底展反彈浪，到十一月又再試見頂，近日股價一度下試去年第三季的支持位，上周五收報6.59元，升3.6%。

照計人民幣貶值，有利聯想產品銷售，現時估值亦已回落至相對合理水平。然而，智能手機市場競爭激烈，且未見到集團如何將製造業務進一步與互聯網結合以提升毛利率前，股價缺乏大升動力，只能在技術上極度超賣時睇位小注博反彈，暫先觀望6元關承接。

司慕渢