Market Insight：電訊股值博率重現

千祈唔好誤會，古勝絕無半點意思想話佢「燈」，在下向來視索羅斯為投資界神級偶像，崇拜程度甚至比長線價值投資鼻祖巴菲特有過之而無不及。對比以時間優勢，以複合增長產生長線增值效果的巴翁，向來無寶不落，從市場短線錯價中搵機會的索老，個人認為成就更大。

這位投資界神人向來以出招狠、快馳名，最重要是行事極度隱密，上世紀為人津津樂道是鬥垮英倫銀行，一晚隊冧英鎊狂賺10億美元一役，當時根本毫無聲息，今次咁高調唱淡，一啲都唔似佢老人家作風，若非賺到夠，肥到着唔到襪，斷估唔會咁高談闊論講自己對後市睇法。

港股仲有上升水位

掌舵量子基金時，索羅斯提過，從來唔鍾意靠持續向上的市況中搵食，專攻轉角市，揚言個人的投資三部曲：落重注、沽空、背痛（對於市況信號他頗相信動物直覺），家陣管自己錢，睇嚟背痛過後，多咗分享睇法，公開認叻的一環。

上周五港股裂口高開後升到底，可能衰得太耐，呢類升市感覺好似恍如隔世，但睇落又唔似虛火咁簡單。港匯即市高低位差近300點子，最高升返上7.7858的「強方」，商品挾番轉頭，紐約期油返回30美元樓上，最誇張係日股，狂升5.8%，亦係午後港股升幅擴大原動力。

看來沽商品及股市、隊港匯及沽期指的三叉戟，有平倉迹象，挾淡勢力覺醒，期指結算前，恒指可以挾到去邊？睇番平安夜高位至今，指數隊超過3,600點，彈返三分一，都可以去返19,700至19,800點，上周五靠邊站無郁手的，似乎仲有啲水位可以追吓。

上星期先話，舊經濟股無得博，騰訊（00700）、網龍（00777）一類TMT股先係炒反彈王道，不過係嫌佢哋跌得唔夠多，上周五升市，果然佢哋彈得比較似樣，騰訊升4.4%，網龍升3%，細隻小小的金山軟件（03888）更升5.2%。

中移業務優勢明顯

此外，三隻跌到殘的內地電訊股都諗得過。去年十二月份數據顯示，總流動用戶淨增長212萬，比十一月的190萬理想之外，亦比過去一年月均162萬上客數字理想。內地用戶淨增長數字，經過超過半年的較低速增長之後，有迹象呈回勇態勢。智能手機的大冧價，多少幫到更多數據用家轉用3G及4G網絡，以目前兩級數據網絡的滲透率大約六成一，相信未來仍有不俗上升空間。

數據亦反映內地流動通訊網絡，有強者愈強的趨勢，睇番聯通（00762）及中電信（00728）的3G及4G市佔率，由一年前的24.7%及17.7%，去到22.7%及17.7%，相反，中移（00941）升近4個百分點去到59.6%，目前中移客戶之中，還有接近六成九是2G，電話用嚟「齋」講的一類，可以預料降價提速及智能手機滲透率改善，對於用戶升級的正面幫助，中移將會是三者之中最大。

一葉知秋，近兩星期芬佬選擇性掟貨，但對電訊股明顯是留了一手，中移股價月中之前見過79元之後，近期已在80元水平打好底，上周五破10日線直衝20日線的83元，看來中短期浪底見咗，呢轉機會唔好錯過。

油價上周四晚由逾十二年低位急彈，帶動「三桶油」周五大幅飆升，中海油（00883）回升8.1%，中石油（00857）亦回升7.9%，至於中石化（00386）亦彈6.3%。由於上周五油價持續反彈，相信三桶油今日仍會順勢再下一城。

油企前景未宜樂觀

油價連彈兩日，市場人士相信主要由於補倉因素。惟長遠方面，導致油價下跌的因素包括全球經濟疲弱，令市場對需求減少，而新能源漸趨普及，亦是令油價下跌的因素。綜觀而言，油價下跌並非是單方面因素造成，在基本因素未能改善下，油價料難保持升勢。

中海油早前公布了一六年度經營策略及發展計劃概要，今年目標淨產量目標4.7億至4.85億桶油當量，較一五年輕微下降，集團預計今年將有四個新項目投產，而目前共有近20個項目在建。今年中海油計劃鑽探115口勘探井，在油價疲弱下，中海油今年的經營肯定困難。

古勝