Market Insight：建築股有捧場價值

昨日港股午後見A股山泥傾瀉，早段升幅立即打瀉一大截，收市得223點進帳收19,935點，睇見主板成交得773億元。港股高位蟹貨一籮籮，浸浸落都見沽壓，幾時見底無得估，但一日唔見恐慌拋售，要有似樣的技術反彈似乎並唔容易。

中國海關昨公布上月的出口數據意外回升2.3%，有部分分析認為是人仔貶值帶動出口回升，古勝就認為可能性唔大。無疑去年「八一一」匯改是人民幣轉角市，經過十年升值進入調整周期，但要留意其他新興市場貨幣比人仔跌得更勁，單一、兩個月的數據回升，恐怕不足以令疲不能興的出口生意逆轉過來。

出口數據未宜盡信

從環球貿易寒暑表波羅的海乾散貨指數中可見，去年底情況只有惡化，沒有好轉。較合理的解釋估計是「八一一」之後境內外人仔匯價差距拉闊，更似是虛報貿易由差額搵食的人為篤數情況死灰復燃；再唔信，睇睇出口數據曝光後相關股份及對中國股市刺激，可以話擲地無聲，大家都無謂諗多咗以係入市信號。

熊市加埋經濟唔好，估值平絕對唔足夠支持真金白銀入市掃貨，最怕買低PE股。當業績受宏觀環境影響，水瓜打狗唔見一截，隨時可以變成無前景的高PE股。要數夠低，非數內銀股莫屬，「中農工建」四行市盈率都係得5倍樓下，表面睇好似好平，但假如一五年業績跌三成，一六年又跌三成，跳兩級，PE立即變成10倍開外，仲抵唔抵，大家自行判斷。

中銀監大員早前在全國銀行業監督管理工作會議上透露，截至去年底商業銀行不良貸款餘額已連升17季，不良貸款率亦連升10季。

內銀估值平又如何

全球經濟低迷已成為常態，加上匯率偏高對中國出口經濟帶來的雙重打擊，高增長模式無疑已走到盡頭，企業經營困難，信貸質素轉差的周期，絕非一、兩年之內可逆轉，一日經濟未見到起色前，內銀估值表徵再吸引都無用，業績跌得快過股價的話，PE只會愈來愈高。

特首施政布告中，出現頻率最多的，意外係去年股市之中，早已炒燶兼玩到爛的「一帶一路」四個字！查實中國自顧不暇兼財力不逮，何來帶路？

去年四、五月炒到癲晒的鐵路、航運、港口及基建技術企業，上面蟹貨之多，恐怕三、兩年內最叻都係博吓反彈，無乜大升條件。至於基建和房屋則年年有數，所以建築股亦每年例炒，但建築業同時抱怨立法會拉布導致多項工程未能展開，變成蜑家雞見水。

近年有不少建築股上市，而且炒味十足，看中的不是業務前景，而是「細細粒容易食」以及賣殼憧憬。當然，亦有中國建築（03311）市值高、業務規模大之股，近月走勢有翻生迹象。

賣殼活動或會收斂

集團去年新簽合同上升16%，今年目標再按年升15%，預計不低於780億元；在現時中港百業皆頹的情況下，此類穩健增長的股份已屬難得，而其一五年預測市盈率不過10.8倍，有一定吸引力。

另一類則是有潛質賣殼股，除了俊和發展（00711）和泰昇集團（00687）市值達20億元之外，普遍只得幾億元市值。除市值低外，大股東持股量則相當高，泰昇、雅駿（01462）以及三和建築（03822）均持股七成以上，其中三和大股東持股71%，一家基金公司持股近一成。

集團過往曾經有上市及賣殼紀錄，一四年重新上市亦不免惹來投資者憧憬。不過，近期港交所（00388）對後門上市似乎有所收緊，賣殼活動可能有所收斂。

古勝