絲絲講場：上司唔妥你20大凶兆

先嚟個上集，呢20個蛛絲馬迹，暗示上司唔妥你。中少過五項，都仲可以當係自己諗多咗；中多過五項就……你諗你。

1. 直覺唔多妥

直覺覺得上司唔多妥你？對你零舍唔同？係對你特別差嗰隻？唔好懷疑，即刻去搵證據。

2. 商量冇你份

上司決定啲關你事嘅大單嘢之前，冇搵你商量、冇問你意見，意味住佢唔信任你。

3. 零眼神接觸

眼神好難講大話，上司避免同你眼神接觸，費時你知佢憎你。

4. 對你無表情

一見你喺度，上司即刻蓄意收起笑容、板起塊面，好明顯佢唔妥你。

5. 對你乜都管

對下屬巨細無遺乜都管，可能係上司本身危機感重，但亦有可能係佢對你失晒信心。

6. 處處避開你

上司見你等(車立)，佢就行樓梯，工作都專登編到撞你唔到。

7. 招呼零反應

每朝你返工同上司講早晨、放工講拜拜，佢都零反應，當你冇到。

8. 一句起兩句止

同你講嘢零舍簡短，一句起兩句止，甚至得聲「OK」或「嗯」。

9. 翹手翻白眼

一對住你，上司就翹晒手、翻白眼；你搵佢時，佢頭也不抬繼續望住個電腦；身體語言最老實。

10. 零正面溝通

上司交代你要做啲咩，都只係經Email或者WhatsApp，完全唔想同你面對面溝通。

11. 道門閂到冚

你上司若果坐Office，但佢房門長期閂到冚，咁可能代表佢唔想同下屬你有任何交流。

12. 乜都唔啱聽

你提咩意見，佢都唔啱聽；但隔籬位講差唔多嘅嘢，佢又Buy喎。點解？好明顯囉。

13. 同你齋公事

上司同你講公事好正常，但同其他人會傾埋屋企啲細路乜乜乜，而同你就齋公事，咁擺明對你零興趣。

14. 齋畀碎嘢做

上司專畀埋啲完全唔使帶腦嘅濕碎嘢你做？呢啲唔係叫體恤，而係唔尊重你嘅能力，甚至可能係想逼你走。

15. 冇彈亦冇讚

無論你做成點，上司冇彈亦冇讚，零反應，咁意味住佢根本唔Care你點。

16. 當眾落你面

人要面樹要皮，佢對隔籬位就「陣間入我房」，對你就公開行刑。好明顯啦。

17. 唔同你講笑

同成班人一齊開玩笑，即當你係自己友；一對住你，上司啲爛Gag忽然唔見晒，好危險囉。

18. 唔畀Credit你

無論你有幾勤力、點諗咗條絕世好橋出嚟，上司硬係唔畀Credit你，咁唔出奇；但若然佢只對你一個咁，你要自求多福喇。

19. 唔使你跟嘢

你落咗成擔心機，上司一句「呢個Project唔使你跟喇」，仲下下係咁；好明顯唔對路啦。

20. 淨係躁你底

對住其他人就有耐性，但對住你就躁底。

余絲韻