騰訊高級執行副總裁張小龍，當日帶住成個Team開發出微信，不過呢位「微信之父」尋日喺微信年度大會上公開話，嫌啲人喺微信嘥太多時間，仲話周圍啲朋友同事個個用到有啲神經質！佢做乜忽然勁踩自己個Baby？做乜倒自己米？搞邊科？
阿微信Daddy話，睇住身邊同事，連開個會食個飯，都每隔2分鐘就要睇手機Check微信，一日由朝到晚Check足朋友圈多達三、四十次；叫佢哋將手機擺埋一邊，5分鐘就捱唔住；唔准佢哋睇，就會手足無措、好焦慮好焦燥，個個都變晒神經質，情況令人擔憂；又話咁樣遠離搞微信嘅初心，即是「一個好的產品是用完即走的……不是黏住用戶」，又話咁搞法朋友圈入面啲資訊會太水、太雜，會趕客。
嗱，入正題喇。原來，阿微信Daddy嚟緊有個新Baby叫「應用號」。張小龍話打算喺微信現有嘅「公眾號」同「服務號」基礎上，推出一個新平台「應用號」。新平台有乜特別？簡單講，用戶關注「應用號」，就好似裝咗一個App咁，但「應用號」唔會推送內容，只提供功能服務，等用戶有需要時搵到佢就得。See，咁咪唔使嘥大家咁多時間囉。
先自踩，再嚟曲線Sell件新Product，企業家果然係企業家！
余絲韻