絲絲講場：CFO睇數仲要顧形象
一間上市公司嘅「靈魂」係邊個？有前輩同絲絲講過，話係CFO（Chief Financial Officer），又或者叫Financial Controller，中文就仲多叫法，無論叫「財務總監」、「財務總裁」、「首席財務官」或「財務董事」，其實都係講緊同一個人，就係公司嘅財務大總管。不過，時移世易，CFO真係今時唔同往日！
兼任Marketing同PR
CFO淨管數，熟財務就得？No啦。呢啲輪唔到絲絲講，有資格講嘅係永嘉（03322）CFO王志強（Terence）。Terence做CFO踏入十年，做過多間中資企業CFO，包括中國動向（03818）、碧生源（00926）、中國網通，到依家轉搞潮服，可以話見證住CFO角色嘅時代變遷。
佢話，以前CFO好注重財務、會計能力，數底好之餘，仲要兼備埋一定嘅相關專業背景。不過到今時今日，呢啲能力只算係CFO嘅「基本功」！
永嘉王志強驟變型男
現時好多CFO兼任Marketing同PR等職能，既要幫手宣傳，又要見投資者、見傳媒，Terence話依家唔少CFO都要參與財務以外嘅事務，基本上「咩都要知」。好似佢自己咁，依家就要負責埋公司E-commerce（電子商務）工作。
聽落，雖然同傳統諗住CFO要孭嘅職責好似「大纜都扯唔埋」，但Terence覺得Handle呢類工作係件有趣嘅事。仲有就係，佢話自己以前着衫的確有少少老土，但佢公司永嘉經營潮服品牌D-MOP及Y-3，佢身為潮服公司CFO，自己衣着都改變咗，要潮啲返工咁話。
話時話，絲絲一睇，本地服飾零售股啲CFO當中，好多年資相當、兼且熟悉唔同行業瓣數嘅臥虎藏龍，難怪被稱做公司嘅「靈魂」。
余絲韻