絲絲講場：26歲財俊呻港男壓力大
連金融才俊都呻「港男壓力大」！咁講嗰位係中國銀河證券（06881）旗下中國銀河國際證券（香港）嘅環球市場部聯席董事王柏勤（Chris）。Chris個團隊主要負責公司嘅香港期權客戶，佢今年26歲已經做到呢個位，佢自己以筆名「歐陽一心」出嘅教炒期權書面世首月仲上埋暢銷書榜冠軍，佢咁都話有壓力？
買樓結婚損財政
Chris同絲絲慨嘆喺香港做男人壓力幾大，話社會對男人期望高，當年紀愈大要面對買樓、結婚、養細路種種負擔，呢啲都足以拖冧一個男人嘅財政。
唔知係咪對呢個問題特別有感受，Chris涉足嘅瓣數奇多。佢早喺大學Year 2已經同朋友搞出版社「墨出版」，專將網絡神作出版成為實體暢銷書，其中一本就係都幾多人識嘅《男人唔可以窮》，個古仔深深刺中港男最痛，後嚟仲紅到電影公司搵埋黃宗澤同鄧麗欣拍成電影。個古仔紅得起，Chris認為或多或少同香港社會現象有關。
男人點先可以唔窮？做金融？金融畀唔少人士視為最有「錢」途嘅行業之一，不過Chris話，坊間好多人對入行有好多誤解，好似有人竟然以為「金融唔使讀，CFA（Chartered Financial Analyst，特許財務分析師）冇用」咁。
做金融必備CFA
佢話，呢個諗法大錯特錯，要入行必須考CFA，咁至證明到畀人睇你起碼有基本知識。他感慨香港有部分從業員知識水平不足，搞到啲機會被外國同內地專業人士蠶食咗。
Chris自己喺大學亦係讀金融系出身，佢諗番起當年有幸遇到位師傅帶佢入行，Chris仲用咗成個暑假去學識期權。
之後Chris仲定期上討論區開Post分享期權心得，漸漸發現市場對呢類知識有需求，於是跟手搞埋個Fans Page，仲索性出埋書教人投資，佢已經出咗兩本期權書（口架）喇。
咁間出版社仲有冇搞？Chris話嫌搞出版社獲利唔夠豐厚，所以已經冇再掂，但離場嗰陣計番條數都有賺少少咁話。
話時話，佢依家30歲都未夠就已經做咗N樣嘢，連佢都呻「港男壓力大」，絲絲戥其他巴打唔知點算……？
余絲韻