近年銀行同支付市場發展都好有挑戰性，絲絲聽講好多金融機構都想搵啲德高望重嘅Banker出嚟擔大旗，八達通尋日就公布，請到中東滙豐非執行主席艾爾敦，接替施德論出任八達通非執行主席。絲絲一聽到艾爾敦，就諗起佢當年做滙豐銀行主席同恒生（00011）行政總裁時個親民樣，可以再見佢風采。
唔止滙豐猛人有新動向，集團旗下恒生亦有前大將回歸，○九年離開恒生去新地（00016）嘅陳國威，明年初會回巢出掌大中華業務主管，專注中國同跨境業務，佢之前曾經做過恒生執董同財務主管，未來雖然做番老本行，但唔同職能，應該都會有新挑戰。
余絲韻