絲絲講場：5招打退職場小人

１）窒頭窒勢插嘴王

身邊有冇同事成日打斷人講嘢？一次半次，算。不過如果無論開會、吹水定講電話，佢都要插嘴、窒住晒，仲點一齊做嘢？

點對付？第一次就由得佢，叫做畀一次機會佢。到佢再插嘴，你就同佢講「唔該畀我講埋先，之後我會好樂意聽你嘅意見。我係講緊……」之後轉身向住其他同事，唔望佢，到你講完，先望番佢。

２）問東問西八卦精

大家只係同事，你當然有權將自己嘅私生活保密。不過，梗有啲八卦精鍾意踩入人哋私隱條底線，係咁問人啲連佢自己都唔會答嘅問題，好似「你係咪暗戀緊阿邊個」、「查實你幾錢人工」咁！

點對付？最簡單係費事答佢，不過若然你為人敦厚，可以笑住同佢講「呢啲嘢，講咗要殺人滅口喎！」又或者「呢啲淨係得我自己同埋心理治療師知。」不過，呢啲人有時係要直接「溫馨提示」先識收口。

３）最無厘頭爛Gag王

公司有個Gag友，唔係壞事，只係如果呢個Gag友24小時都喺度搞爛Gag，阻住你做嘢，兼且當全人類趕緊認真嘢時，佢依然喺度超無聊勁搞笑，係咪想殺咗佢呢？

點對付？嗱，殺人太複雜，簡單啲嘅方法係無視佢。每次佢又搞爛Gag嗰陣，係咁意冷笑一吓應酬咗就算，之後拉番個話題返嚟。記住，重點係等佢冇癮。

４）扮大佬諸多批評

佢同你咁高咁大，不過喺度扮大佬大姐，仲畀埋好多「建設性」批評。

點對付？搵間Coffee Shop同佢單對單傾，先讚佢話「好欣賞你咁為公司」，再入正題，「不過，你咁有建設性嘅意見，唔只阻住我做嘢，仲阻埋老細添。」再舉例佢點阻住地球轉，然後話「雖然我好尊重你嘅意見，不過都係留番直接影響到你做嘢嗰陣，先好提我。」搞掂！

５）職場技安專恰人

專蝦蝦霸霸嘅技安（叫胖虎都得），公司一樣有。你做乜，佢都踩。文雅啲講，就叫欺凌；直接啲講，就係明恰你。

點對付？如果佢純粹把口刻薄，你可以唔理佢，又或者直接話「我唔接受呢啲說話」。不過如果已經去到威脅、恥笑同侮辱嘅地步，你最好都係同老細或人事部講聲。

職場賤精何只5類，你又有冇遇過第6、甚至去到第15類呢？即去東網Money18個facebook專頁 http://www.facebook.com/money18 留言同絲絲分享吓啦。

余絲韻