絲絲講場：港產手遊過關打入股場
最新消息傳來，香港本地嘅智傲集團（Gameone Group Ltd）已經通過港交所（00388）嘅上市聆訊，嚟緊有望喺創業板上市。而呢間公司嘅主席同執董就係香港有名嘅遊戲製作人施仁毅，佢曾經參與嘅遊戲作品有《臥龍與鳳雛》、《古龍群俠傳》同《古惑仔online》，唔少人都有玩過，就算冇玩過，都應該睇過佢嘅漫畫創作，例如九把刀嘅《殺手》。
項明生任非執董
施仁毅除咗創辦過全港首本電腦遊戲雜誌《Pc Game雙週》之外，如果Gameone成功上市，仲為港交所帶嚟第一隻本地手機遊戲股添。
值得一提嘅係，原來智傲集團嘅非執董係旅遊達人項明生，作為前Sony Play Station董事總經理，應該對電腦遊戲好熟悉，佢曾經夥同施仁毅一齊開發、營運、發行唔同嘅遊戲，嚟緊仲會陸續推出動畫改編遊戲、網頁遊戲、手機遊戲等。呢個組合，應該又會為香港帶嚟一番新的手遊熱潮。
另外，根據招股書顯示，施仁毅曾經喺二○○一年成立過「勁一番科技集團有限公司」，二○一一年又成立過「Top Game Limited」，不過最後都未營運過。
余絲韻