Market Insight：航空股被過分低估

之後點呢？係最多人問的問題，由聯儲局委員預測，明年終聯邦基金利率，維持1.375厘不變，意味着前晚一刻，成員心目中明年尚有1厘的加息空間，以一、三、四、六、七、九、十一及十二月，合共八次議息會議，每兩次會議加一次息的可能性頗大。

當然，聯儲局預測年終利率仲係會因應通脹及經濟復甦強度變更，如果強美元對經濟及物價的壓抑作用比預期大，出年美國加唔到1厘都唔定。

從一四、一五零息期間都去唔到2%的通脹目標，加息後就更難，估計除非歐、日及中國經濟都明顯復甦，可以逐步退出寬鬆措施，否則明年美國可以加息的幅度仍十分有限。

市場反應極冷靜

以為講咗N次的《狼來了》故事，主角終於登場，金融市場會好震撼，實際加息後市場反應卻出奇地冷靜！美股升純粹是追補一五年落後於歐股的反應，美匯指數繼續在98水平徘徊，人人以為重災區的新興市場，昨日巴西主權評級畀惠譽降到垃圾級，股市無反應，反而巴西法院禁制WhatsApp通訊四十八小時，成為國際新聞，連放緊產假的朱克伯格都要回應。

此外，阿根廷取消外匯管制，其實都係搵藉口等管方價浮向黑市價，加入貨幣戰玩競貶，去解決經濟停滯不前的問題，夾埋等美國加息至出招，不過驚死披索插水唔能夠一步到位無水花而已。

周三經已偷步，昨日港股仲有170點進帳，對「大時代」以來長期積弱的大市而言，都算合格以上。古勝昨日話炒成品油價唔減係浪費時間，果然「三桶油」升勢一日玩完，紐約期油再插到落35美元邊，海灣國真係愈窮愈見鬼，油元入不敷支，OPEC老大沙特在現時油價水平下，財赤勢必失控，未來兩年債務佔GDP有機會飆到50%，隨時將現時相當全國產能一成六的閒置生產力推埋出街，油價已經跌入惡性循環的漩渦，除非嫌錢腥，否則無謂博反彈。

人仔料有序貶值

低油價下，高石油消耗行業如航空業本來最着數，不過幾隻內地航空股如老僧入定，唔多見到資金追捧，講到底，係人仔貶值預期下，習慣借美金，享受「欠債縮水」內地航空股，怕人仔轉勢，會有咁耐風流有咁耐折墮的下場。過去半年，人仔貶值5%，遠期合約顯示仲有2至3%的貶值可能。

從好的方面去看，最大嗰浸經已跌咗，大行計人仔兌美元每跌1%，三隻本地掛牌的內地航空股，匯兌損失大約等於一六年盈利5至7%。

的確，死數係咁計，但因為人仔過去幾年的強勢，令出外航線需求增加因素明顯被忽視，好似南航（01055），首三季國內外航線增長分別有10%及30%，核心收益計一六年PE唔夠6倍，人仔如果貶值有序，目前估值過分反映不利因素，而東航（00670）亦有同感。

美國加息，市場預期長短債孳息率擴闊有利大型銀行財資收入，沉咗一排的滙控（00005）同渣打集團（02888）終於見報復式反彈。早前有大行分析指，若美國加息，將有利滙控的淨息差及收入增長，惟滙控已連續兩日反彈，相信短期會受制於100日線62.5元。

渣打只宜博反彈

另外，自十一月中旬股價已持續走低的渣打亦乘勢反彈，而摩根大通更發表報告指集團供股後，反映新行政總裁已留意到資本問題，加上目前估值已反映飽受挑戰的營運情況，相信集團新策略有助降低下行風險，故維持「增持」評級，目標價870便士，相當於100.84港元左右。該行認為，渣打現價僅相當於一六年至一八年預測市盈率各9.5倍、5.9倍及5倍，長期價值開始顯現。

在金融股氣氛回暖及大行唱好下，渣打昨日在成交急增配合下急彈，以61.85元收市，升幅8.6%，成功收復10日線。由於渣打股價經過連日下挫後，昨日才初現反彈，反彈勢頭可持續，料短期可進一步收復20日線63.1元水平，可小注跟進。

古勝