內地兩大險企安邦保險同國壽（02628）嘅遠洋地產（03377）爭奪戰有新進展。話說，安邦近期動作頻頻，意圖奪得遠地大股東嘅寶座。截至尋日，遠洋公布，國壽持有遠地22.53億股，險勝安邦保險截至本月九日持有嘅22.52億股股份。
其實喺呢份通告出街之前，安邦近日已多次增持遠地。繼本月七日安邦斥77.84億元買入遠地至20.5%股權後，九日再度出招增持，持股比例提高至29.98%。而遠洋地產另一股東九倉（00004）早前表示，以每股5元悉售所持的4.45億股，市場估計係由安邦接貨。
有消息話，安邦保險入股之前，遠洋地產多年處於「三國鼎立」，即係大股東南豐、國壽同埋董事局主席李明及其團隊，事前冇人估到安邦保險突然殺出嚟做「架樑」。而安邦的接連增持，有一段時間國壽同遠洋地產都處於仲唔知頭唔知路嘅狀態。而尋日遠洋出通告暗示國壽先係大股東，令成件事更加耐人尋味。
話時話，安邦由路人甲躍升至遠洋第二大股東，只係用咗唔夠半個月嘅時間。安邦個勢咁進取，睇嚟做大股東係志在必得，唔知下一輪攻勢又幾時會出手呢？
余絲韻