絲絲講場：郭台銘：富士康工人食腦保飯碗
中國工信部有關中國機械人「十三五」規劃初稿已經完成，目標係到二○二○年嗰陣，內地工業機械人嘅數量達到80萬，國產化率達到一半以上。
內地工人被機械人搶飯碗已擺在眼前。難怪剛剛喺浙江烏鎮舉行緊嘅第二屆世界互聯網大會上，富士康集團總裁郭台銘被傳媒爭相追問富士康內地廠房引進機械人嘅最新情況，未來會唔會由機械人取代工人嘅工作。郭總即時笑住咁回答：「工廠引進機械工人係大勢所趨，但富士康大量引進機械工人之後，工人嘅數量並不會因此而減少喎！」
引進機械人做勞力
郭總解釋，道理好簡單，未來富士康工人會由當前嘅勞力工作為主，轉變為以腦力工作為主，啲勞力工作就交畀機械工人。照郭總咁講，咪即係工人喺工作上識得食腦嘅，就唔使驚會被機械人搶咗飯碗啦！
之不過，出席同一場合嘅百度董事長李彥宏就話，喺不久將來，所有簡單重複嘅腦力勞動，一樣會被人工智能所替代。這和機器取代簡單重複嘅體力勞動一模一樣。
李彥宏並透露，百度嘅搜索引擎喺5年前就已經係基於機器學習了，而機器學習正係人工智能裏頭嘅一個分支。佢並指：「喺以前，人工智能嘅技術實現和成本都還不成熟。但喺現在，百度無人車嘅路測成功，已經證明人工智能可以應用到駕駛中。」李總話人工智能才係未來中國「互聯網+」戰略嘅一個重要組成部分。
喺大會上，騰訊嘅技術代表就表示，自家研發嘅自動化新聞寫作機械人，一分鐘內可將重要資訊和解讀送達用戶，睇嚟，點都叫做靠腦力寫作嘅記者們，都有畀機械人搶走飯碗的一日囉！
余絲韻