孖妹Ｓ檔案：湊大Baby股 唔使400萬
「風之后」李麗珊曾經話齋：「養大一個細路要400萬！」做人父母真係甚艱難，現時連內地父母亦大呼養B難，內地網民仲話：「孩子是最貴的奢侈品！」事關內地瘋傳不同城市的湊仔成本排行榜，北京以276萬人仔（約332萬港元）成本排首位。喺二孩政策下，究竟由媽咪懷孕開始到小朋友長大，有乜概念股值得湊？
譚：富昌金融研究部總監 譚朗蔚（Stevan）、盧：興業證券（香港）副總裁 盧駿匡（Chris）
短炒難 長揸慎波動
彩兒：內地國家衞生計生委估計會有1,700萬個BB因應全面開放二孩政策而喺未來5年出世，想炒二孩概念股應該點部署？
譚：新一代出生，未來投入勞工市場，的確可以帶來人口紅利，促進經濟增長，推動相關板塊盈利同股價，但我今次對二孩政策效果嘅睇法會長線少少，主因五中全會宣布政策出台後，留意到只有個別概念股有得升，但隨後就回落，可見今次帶動股份數目同升勢，唔似以往咁多咁強。市場對政策已憧憬一段時間，令政策真正推出時反應不大，缺乏短線炒作機會，反而長線部署則可考慮，但選股長揸要留意波動性。
盧：不過，因應內地經濟增長放緩，加上今年工資增幅不大，我有內地朋友都未必想再添多個B，主因生多個對家庭支出影響唔細，佢哋反而想將資源集中喺一個小朋友身上，可見城市人未必會再添丁，鄉村就一向有超生問題，受政策影響唔大，料中短線內地人生育意願唔會急劇提升，相信要經濟有起色，先會有番生B意欲，故選概念股要好小心。
懷孕期：和美醫療7元入得過
Kitty：概念股多成咁，即係叫我大海撈針啫！
譚：我哋可以參考以往美國嬰兒潮嘅情形，去決定選股先後次序，喺媽咪懷孕期，固然要做產檢，BB出世後，媽咪亦需要做婦科檢查，所以不妨留意和美醫療（01509），佢喺私家婦科醫院市場佔有率達13%，市面上缺乏同類股份選擇，佢蟹貨較少，所以向上阻力細，7元水平支持力度強，係較理想嘅入市價，目標價係歷史高位8.4元，鑑於佢係半新股，缺乏參考阻力位，一旦衝破高位就如入無人之境，相當好炒！
鳳凰醫療出年再追
盧：女性懷孕後好需要葉酸嘅補充劑，但未見有主力做同類產品嘅藥股，其實投資者可留意提供綜合醫療服務嘅鳳凰醫療（01515），除咗業務包含婦科外，亦可以幫到小朋友打防疫針，值得關注，惟近期技術走勢較弱，建議在明年農曆新年後再作部署。
嬰兒期：童裝股耐心等收成
彩兒：BB就出世，唔通要獨沽一味炒奶粉股咁娘？
譚：我留意到呢一輪當炒嘅童裝及兒童用品股，只有中國兒童護理（01259），股價表現較同業為佳，建議投資者日後進行相關概念短炒時，要揀早前因應同類消息被炒起過嘅股份，相信日後一旦公布有起色嘅生育數據，佢會較當炒，而且兒童服裝產品需求生命周期較奶品長，動輒有8至10年時間，適合長揸，股價現時處於歷史低位，若收集便要有耐性等收成。
主力做傳統嬰兒保健品，例如開奶茶等嘅衍生（06893），產品獨特，同類上市公司選擇唔多，屬另類之選，佢十月由約0.9元起跑，保持升勢，更受品牌效應帶挈，可於1.1元買入，上望歷史高位約1.6元，若升穿就可反地心吸力！
消耗品商營銷勢飆
盧：BB去街最好有架嬰兒車代步，嬰兒車製造及分銷商隆成（01225）走勢較同類股份為佳，雖然近月跟隨市況下滑，現時正處於橫行底部，大可等跌勢回順、並確認升勢先入市，若可出現價量齊升嘅突破，升幅會不俗，但要留意股份波動性高，成交唔活躍，投機性較高。
此外，嬰兒主要消耗品少不了奶粉及尿片，奶粉股之中，合生元（01112）技術走勢較佳，佢進口唔少奶粉，甚受內地用家歡迎；恒安（01044）除咗造紙巾，都有造尿片，若政策藥力發時，實會刺激呢類消耗品製造商嘅營業額。
幼兒至青年期：楓葉教育短炒首選
Kitty：小朋友返學，又可以帶動乜股份？
盧：若父母到外省工作，小朋友好多時都冇戶籍，因而要入讀私校。楓葉教育（01317）主力營辦國際學校，近期股價走勢一浪高於一浪，更曾創新高，顧及近月恒指弱勢，鮮有創新高股，即使大市出現震盪，該股亦冇出現顯著跌幅，甫下跌已有資金承接，走勢優於大市，屬短炒首選。
安踏受惠 跑贏大市
小朋友返學之後自然多咗玩體育活動，對體育用品及服裝需求會有提升，體育股如安踏體育（02020）勢受到帶挈，該股自九月起反覆向上，股價高於50日與250日移動平均線，亦顯著跑贏大市，建議等佢跌穿50天線並出現反彈時，若其時RSI強弱指數回升至50以上，則不妨買入短炒，並以反彈底部作止蝕位。
3千萬BB搶閘迎新政
雖然內地二孩政策可以話係「千呼萬喚始出來」，但係唔少父母反應唔算熱烈，歸根咎柢，都係因為內地湊B成本日漸提升，搞到大家都怕養唔掂，要諗過度過先行動！
養北京仔女最吃力
孖妹留意到內地網上瘋傳一個「中國10大城市生育成本排行榜」，頭四位湊B成本都過200萬人仔。北京最誇張，養大一個小朋友要父母不吃不喝23年，同香港慘況相若。
不過，內地國家衞生計生委嘅預算都幾樂觀，佢以現時1.4億已經生咗1個B嘅已婚育齡媽咪計算，喺全面實施二孩政策後，新增可以生兩個B嘅目標人群約9,000幾萬名，預計當中有33%人會生，合理估計有28%人會生，保守估計則有23%人會生，即係最多會有約3,000萬個B、最少都會有約2,000萬個B搶閘出世喎，當中一定蘊含唔少商機啫！
若有料報畀彩兒同Kitty或有嘢問，可電郵money.biz@on.cc
彩兒、Kitty