孖妹Ｓ檔案：華經濟前景 點睇至準

爆煲論參考指標少難服眾

J：嘉信理財公司高級副總裁及首席全球策略師　Jeffrey Kleintop

林：農銀國際證券研究部聯席主管兼董事總經理　林樵基

嘉信Jeffrey Kleintop表示，中國經濟最大憂慮是，製造業會否放緩得太快，以致影響消費。　（孫冰玉攝）

農銀林樵基指，近期中國經濟增長整體放慢，但屬正常現象。 　（黃知樂攝）

服務業漸擔起大旗

彩兒：中國今年第三季GDP增長放緩至6.9%，「保七」失敗，上星期公布嘅官方製造業採購經理指數（PMI）又跌至49.6，連續四個月處收縮水平，啲數據咁差嘅。

Kitty：聽講內地好多工廠依家都經營困難，唔通中國經濟真係會爆煲？

J：好多人仍然覺得中國經濟係由廉價出口主導，仲係着眼於碼頭運輸、製造業用電量、進出口貨值呢啲指標，但其實依家服務業先係中國經濟嘅真正動力。中國十月份嘅零售總額有11%增長，服務業PMI亦穩步上升，服務業嘅增長可以抵銷部分製造業嘅衰退，所以整體經濟增長放緩嘅步伐唔係好快。中國GDP未來應會繼續下滑，但大家唔應該只注視表面數字，GDP嘅質素先係重要，例如GDP增長會帶來幾多工資增長、會唔會係靠好多借貸拉動等。

彩兒：你預期中國經濟唔會出現硬着陸，但點都會有啲憂慮啩。

J：我最大嘅憂慮係製造業會唔會放緩得太快，以致工作職位急速流失，影響消費能力。另外，現時市場一般預期聯儲局每隔一個議息會議就會加一次息，每次加0.25厘，若果美國加息太快，將會加速資金由新興市場流走，中央控制人民幣匯價嘅難度會增加；而中國仍依賴對外出口，或受環球需求疲弱拖累。

彩兒：中國今個星期又會公布居民消費價格指數（CPI）、新增人民幣貸款、M2貨幣供應等多項經濟數據，聽到頭都暈，不如你話我知重點要睇咩指標啦。

基建投資勢頭仍佳

林：我哋鍾意睇零售數據，有人話中國零售總額升得太慢，未必彌補到經濟其他方面嘅放緩，但留意吓入面啲細數，就會發現有玄機。零售總額部分係畀石油類產品嘅數字拉低，大家都知油價喺過去一年跌咗好多，相關產品售價相應下跌，令零售總額降低。睇番電子產品同汽車嘅零售額，其實都做得幾好（口架），中國人仲係願意消費，當油價穩定番，整體零售數據應該會唔錯。

彩兒：原來單係一項經濟指標都會有咁多嘢睇？

林：我亦會睇重中國嘅固定資產投資，因為今年呢個數下滑程度比大家想像中高，按年增長放緩到約10%，比以往20至30%低得多。國情就係前幾年房地產發展太蓬勃，令樓房庫存較高，樓房投資下滑，但基建項目投資仍係非常大。事實上，中國固定資產投資嘅基數大咗好多，冇可能持續高速增長，重要嘅係所產生嘅經濟效益有幾高。例如起咗層樓，起嗰年所請嘅工人有糧出，係好事，但如果層樓位置唔好，落成後冇人住，呢個投資就冇持續效益，相反如果有人入住，帶旺咗個區，就可帶來持續發展。睇表面數字之餘，我會睇吓個別項目會唔會為相關地區帶來GDP增長。

Kitty：唔少人都話驚中國會陷入通縮，反映通脹嘅CPI會唔會都係你比較留意嘅嘢？

林：會呀，事實上通縮問題比通脹壞得多，因為前者會令投資回報下跌，令人會對投資卻步，經濟因而會愈來愈差，陷入下行周期，中國推出咁多刺激措施，就係要避免呢個情況。近期中國嘅CPI按年升幅的確比以往低，只有一點幾個百分點，反映經濟增長整體放慢咗，屬正常現象，暫未見到個數連續幾個月持續下降，所以唔需要太擔心有通縮問題出現。但就要留意住零售商會唔會因為經濟急速放緩而要減價促銷，令通脹率大幅下降。另外，CPI可細分為食品同非食品價格兩類，前者會受天氣情況影響，睇嘅時候要留意價格升跌是因為需求定係供應改變。

Kitty：新增人民幣貸款同M2貨幣供應又可以點睇？

林：呢兩個數對經濟復甦好重要，其實已反映到中央降息降準措施開始見效。上個月新增人民幣貸款數字公布嘅時候大家都好驚訝點解咁低，但要小心啲睇，八、九月比平常高咗好多，所以十月份放緩番係正常嘅，而事實上十月份M2貨幣供應數字幾高，代表啲錢流轉得好。今個星期公布嘅新增人民幣貸款應該可以穩定番至七千至八千億，M2貨幣供應增長可能會喺13%嘅合理水平。

彩兒：唔少人都質疑中國經濟數據嘅真確性，你又信幾成？

林：所有統計都唔會完全準確嘅，個別數字唔重要，重要嘅係由唔同數據睇出經濟嘅大趨勢。

可藉外企業務評估

Kitty：除咗官方公布嘅數據又可睇啲咩？

J：我會睇埋企業嘅盈利數據，好似通用電氣（GE）、蘋果公司（AAPL）、可口可樂（KO）呢啲有喺中國賺取盈利嘅公司，從佢哋嘅中國收入，都可以評估到當地嘅經濟情況（口架）。

彩兒：如果想冇咁離地咁了解中國經濟實況，又可以點做呢？

林：咁就喺當地搭的士嘅時候同司機傾吓偈啦！

若有料報畀彩兒同Kitty或有嘢問，可電郵money.biz@on.cc