尋日一個互聯網金融論壇上，絲絲聽到唔少香港年輕人呻，本地發展空間、配套唔夠，佢哋寧願北上創業。
「怕畀警察拉，乜嘢都講Compliance（合規）！」喺內地搞交通卡（類似香港八達通）嘅「都都寶」行政總裁何宗盛本身係港人，但佢話喺香港做互聯網金融好難，佢仲話希望有日啲監管機構可以隻眼開、隻眼閉咁，等佢哋做咗先管。
同場，前海管理局香港事務首席聯絡官洪為民又話，香港過去引以為傲嘅超穩定金融體系，阻礙咗互聯網金融發展，佢叫香港要思考吓監管去向咁話。
不過咁喎，香港就係監管嚴、金融體系夠穩定，先吸引到咁多大公司嚟，先做到國際金融中心喎，啲嘢執正始終有執正嘅好。
余絲韻