絲絲講場：雷軍賣嘢Sell到上床
講起小米賣乜，唔使諗都知係小米手機、紅米手機、小米手環諸如此類，點都同電子產品有關，但佢最近「不務正業」到呢，連床褥都賣埋。
小米眾籌平台有「8H乳膠床墊」可供「預售」，就咁，叫得做「眾籌」，個概念原則上係向公眾籌錢生產張床褥？！唔通係智能床褥？No喎。咁至少係插電啩？亦唔覺喎。網上張床褥相，絲絲睇嚟睇去，至智能嗰Part睇怕係床褥上面有部手提電腦，不過係畫出嚟嘅。咁即係？即係乳膠床褥一張。
旗下入股床褥公司
不過，小米「不務正業」絕對唔係今日嘅事，唔信上官網睇，棒球褸都有得賣！就當件褸上面有個「Mi」字小米嘜頭都勉強講得通，咁豬錢罌、膠水樽、行李篋呢？
至於張床褥，你唔好理，短短四日已經有七千幾件預訂，超晒500件嘅目標。
嗰張床褥同小米真係大纜都扯唔埋？就咁嘅，呢張床褥係由一間成都公司研發，小米董事長雷軍旗下投資公司今年四月啱啱入咗股。
見張床褥宣傳「安放你的青春」，絲絲位男同事即刻陰陰嘴笑，笑咩呢可。
余絲韻