孖妹Ｓ檔案：加息前芬佬教炒股債

孖妹倫敦直擊；動盪市險中尋寶

G：施羅德全球國際股票部產品經理　Gavin Marriott

彩兒：嘩，我哋腳踏呢個倫敦金融城得一平方英里，但截至去年呢度有超過15,000間企業，去年度產生逾100億英鎊稅收。呢度行過嘅人，唔少可能真係分分鐘幾十萬鎊上落o架。

Kitty：呢度有唔少金融界專家，我哋可以攞到好多料。唔知美國加息在即，呢度掌管數以億元計資產嘅「芬佬」驚唔驚金融市場會大亂？

G：美國加息已經喺市場預計之中，聯儲局應該可以好好控制加息步伐，唔會令市場出現動盪。至於新興市場，佢哋有自身嘅結構性問題，其表現未必同美國加息有最大關係。

施羅德嘅Gavin Marriott話，睇好成熟市場，但新興市場亦有唔少好公司。	富達嘅David Buckle話，投資債券分散風險非常重要。	富達嘅Andrew Wells話，高收益債嘅走勢同聯邦基金利率相關度好低。

留意跑贏大市股份

Kitty：聽你咁講，我個心都定番啲。

G：依家環球股市資金充裕，但另一方面整體經濟增長放緩，市場亦擔心中國嘅經濟問題，所以要好仔細選股。大市走勢唔係太重要，重要係搵到跑贏大市嘅股份，因即使經濟大環境唔好，仍有公司可交出理想嘅盈利增長，帶動股價上升。

彩兒：咁你有咩揀股大法呀？

G：據我哋統計，盈利可以勝於市場預期嘅企業之後多數會跑贏大市，我哋揀股會由呢個方向着手。賣方分析員計算股票估值時，多數只考慮公司未來十二至十五個月嘅情況，但我哋會考慮公司至少三年嘅發展，以更準確搵出其內在價值。

Kitty：咁你即係買重邊個市場同行業呀？

G：我哋個投資組合涉足嘅行業同市場好廣泛，當中科技同醫藥股整體佔比較重；我哋對新興市場仍然謹慎，認為市場對佢哋嘅盈利預測仍然太高，相反美國公司就有好好嘅增長，歐洲企業亦都趕緊上嚟，業績未來好可能有驚喜。

G：我哋整體比較睇好成熟市場，之不過新興市場亦有唔少好公司嘅。如果你留意過去十八個月新興市場同成熟市場嘅表現，可以睇到資金明顯偏好後者。但你睇真啲，唔少成熟市場公司嘅盈利倚重於新興市場嘅收入，股價表現同新興市場股票相若，所以唔好咁簡單去分成熟市場同新興市場公司，仲要睇埋公司盈利來自邊度。

彩兒：你冇提中國股票嘅，唔通你都驚咗中國經濟增長放緩，或者畀六月A股大跌嚇親？

華科技消費股值博

G：中國市場部分股票嘅投機活動仍然好犀利，中、短期會好波動，整體有唔少風險，但有愈來愈多個股值得投資，尤其係科技同消費板塊嘅股份，例如騰訊（00700）、京東（美股：JD）、阿里巴巴（BABA）等。

Kitty：你都睇好「新經濟」股？

G：「新經濟」同「舊經濟」股只係一個籠統嘅名，重要嘅係公司擁有顛覆性嘅科技，能夠改變傳統嘅分銷渠道或工業程序。市場好多時都未能準確預測呢啲公司長遠嘅增長，有明顯競爭優勢嘅公司一般長期會被低估，好似騰訊咁吖，佢嘅業務分散，而且愈來愈多業務可以變現，市場就正正低估咗呢方面可以帶來嘅盈利增長。

彩兒：你鍾意嗰啲科技股下下都幾十倍PE（市盈率），買呢啲股份真係同買名牌袋一樣咁肉痛呀！

G：如果預測到一間公司未來有強勁增長， 我唔怕畀20、25甚至30倍PE嘅價錢去買，例如Amazon（AMZN）、 Google（GOOG）同Apple（AAPL）咁吖，佢哋有結構性嘅增長動力同競爭優勢，持續交到成績，值得有較高嘅估值。市場好多時都擔心呢啲公司嘅PE過高，呢個反而係機會所在。

美科技醫藥回報高

Kitty：你咁睇好美股吖，但美股個牛市都行咗六年啦，仲未見頂咩？

G：以估值嚟睇，美股離泡沫仍係好遠，以往出現重大調整時，估值都比現時高得多，大市未來十二個月嘅回報唔會好高，有可能得單位數數字，但我哋唔會太理整體市場嘅表現，只會睇個別有驚喜嘅股票。美股市場嘅結構係有所改變，科技板塊明顯比十年前具領導地位，工業企業喺整體經濟同股市嘅重要性低咗，短期科技、醫藥股嘅回報係會明顯跑贏，但其他行業都唔係搵唔到投資回報嘅。

彩兒：你連美國加息、中國經濟放緩、美股見頂都唔驚，其實有咩可以嚇到你（口架）？

G：我諗長遠嚟講係各國債務不斷上升，呢個問題某個時候始終要解決，到時市場必會有一番動盪，依家通脹咁低，我哋冇得靠通脹令債務消減。

料對債價影響微

D：富達國際投資量化研究主管　David Buckle

A：富達國際投資固定收益、富達投資方案及房地產部環球投資總監　Andrew Wells

彩兒：投資股票之餘，我都想買入債券分散風險呀，不過美國加息會唔會令債價受壓呢？

D：聯儲局應會十二月開始加息，一年或加2至3次，但美國經濟嘅本質已大大改變，人口增長減慢咗，經濟增長唔會高，所以今次呢個加息周期嘅步伐會比以往慢得多。美國國債嘅收益率將會升（即債價會跌），但唔會升得快，而現時美國企業債收益同國債收益嘅差距非常大，前者喺加息周期下嘅升幅應會低於國債，即加息對其投資回報（債價）嘅影響相對小。

亞債收益降 吼華企

Kitty：咁嘅情況下，買咩債券好？

D：我會建議投資者買入企業債多於國債，唔好因為擔心加息而刻意降低債券組合年期，因咁做會損失好多收益率。另外，美國債券嘅收益率上升緊（債價下跌）嘅同時，亞洲債券嘅收益率正在下降，值得買入，當中我就將唔少資產配置咗喺中國企業債。

A：我就喺高收益債見到好多投資機會，有人擔心美國一加息，資金就會大量流出高收益債券，但我唔擔心呢個情況會出現，因為投資者依家喺國債根本搵唔到咁好嘅回報率；而據過往數據顯示，高收益債嘅走勢同聯邦基金利率相關度好低o架咋。

彩兒：但怕唔怕加息後啲企業唔夠錢還呀？

D：基於美國經濟穩定增長，利率上升嘅速度慢，公司唔難進行再融資，所以我預期未來美國企業債嘅違約風險仍會較低。事實上，以往無風險利率已經可以抗衡通脹，但央行推行量化寬鬆下，投資要承受更多風險先可以抗通脹，喺咁嘅環境投資債券，分散風險非常重要，而其中一個方法就係平均分散買入唔同地區嘅債券。

若有料報畀彩兒同Kitty或有嘢問，可電郵money.biz@on.cc

彩兒　Kitty