理財Campus：但求置安心 28歲甘做樓奴

28歲的Rondy與家人同住堅尼地城，手持同區一個私樓單位。他去年買入西環加多近山附近的單幢住宅，樓齡逾20年，售價370萬元，建築面積約390呎，屬業主急沽的筍盤。當時他承造七成按揭，以約150萬元作首期及稅項支出等。

以為30歲前就能上車已很厲害，那就大錯特錯。他23歲時已首次置業。「父母喺八十年代買入堅尼地城一個單位，死慳死抵好快供完層樓。直至九七金融風暴，家中面臨破產，但好彩仲有層樓住，成長背景令我覺得有層樓好重要。」當年他只有10歲。

兼職死慳儲錢上車

中六時，學校師友計劃的導師啟發了他對理財的觀念，「退休時住屋、醫療及生活開支龐大，所以趁後生就要配置資產，買樓係其中一項。」了解到理財的重要，他大學就開始「開源節流」。「大學支出集中喺食頹飯同往返屋企、大學嘅交通費，另外兼職平均月賺過萬。」他指，兼職月入高峰期達2萬元。短短三年間，他已儲逾20萬元積蓄。

「畢業後發現原來供樓仲抵過租樓，咁梗係買樓！當時以積蓄同埋沽空期指獲利的資金合共近40萬元，買入當時市值128萬元九龍灣得寶花園的單位，建築面積約370呎，月供3千元，但放租都已經有6千元。當年銀行見我啱啱畢業，要阿爸做擔保人先批貸款。」

轉手賺百萬 呻賣早咗

不過，因擔心歐債危機出現，Rondy持貨兩年就出售單位，「以為樓市會出現調整，如果銀行突然call loan就好大鑊，又見層樓升咗100萬元，所以賣咗先。點知愈升愈有，當買個教訓，睇咗年幾先再搵啱層樓。」去年，他買入位於西環堅尼地城一私樓單位，以現時同類單位的售價比較，該單位已升值近100萬元。

他指搵樓過程辛苦，除考慮價錢外，還要研究單位間隔、交通配套等，故改變了他將來換樓的想法。「要揀啱心水樓真係好難，所以之後一定會先買樓後賣樓，唔會畀自己無樓在手」。

Rondy現時年薪逾40萬元，單位則月供1.1萬元。雖他指暫時沒有供款壓力，惟未到三十歲就要負樓債，或是外界形容的樓奴。他卻認為，「每個人投資需要都唔一樣，呢一刻買樓係我最好嘅選擇。」