絲絲講場：商品大王最成功投資係女

商品大王羅傑斯縱橫投資市場，股市、黃金、大宗商品都難佢唔到，咁佢又點睇自己做嘅投資呢？羅傑斯尋日喺香港出席論壇時話，自己一生中最成功嘅投資就係女！就係生咗佢兩個囡囡Happy同Bee。

尋日仲即場播放佢兩個囡囡嘅生活片段，大女Happy（12歲）朗讀邵雍嘅《蒙學詩》，細女Bee（7歲）就唸急口令同李白嘅《靜夜思》，幾咁Sweet，呢兩個囡囡啲普通話非常標準，好過絲絲唔在講，分分鐘好過大家添，咁梗係，羅傑斯就係為咗兩個囡囡可以學好中文，幾年前先成家由紐約搬去新加坡。

羅傑斯出咗名睇好中國市，佢仲出名係「愛女號」，錫女錫到出晒面。第時囡囡大個帶個中國男仔返屋企，老竇點睇？羅傑斯話，呢啲留番畀囡囡自己決定，仲反問論壇主持人話，咁問唔係覺得中國男仔有咩問題吓嘛。睇嚟到時怕且要先過呢位廿四孝老竇關。

余絲韻