絲絲講場：鄧聲興做Daddy「好」幸福
君陽證券CEO鄧聲興（Kenny）唔聲唔聲，原來已經升呢做咗爸爸！恭喜晒！佢話「撞彩」生咗對Twins，仲要一個囡囡一個囝囝，係家姐同細佬，Kenny話有咗呢對龍鳳B夠晒數，唔打算再追。
龍鳳胎搵師傅改名
鄧太喺上星期六開刀生BB，兩個B分別重4磅幾，母B平安，預計呢兩日就出院！Kenny話，因為孖胎一定要開刀生，所以搵定師傅擇吉時生。至於改名，佢會搵師傅幫手改，改完中文名先再配英文名。
為咗呢對B，屋企已經預咗間房，仲請定陪月。做咗咁多準備工夫，仲有嘢未做，係乜？就係仲要諗吓要點報答吓太太，事關陀B已經唔簡單，仲要一次過打孖陀。Kenny話會同太太去旅行，原本想去歐洲，不過依家怕危險，會改去日本。Kenny仲話，要好捨得咁放低對B先有得去玩。
余絲韻