絲絲講場:會計師日薪14萬!

會計師公會今年七至八月做咗個會員調查,發現喺上市公司做高級管理層或董事嘅公會會員人工都幾和味!喺調查入面,最高薪嗰位年賺5,100萬元。當除開12個月計,即是月入425萬元,日薪近14萬元 (口架)!

唔少做上市公司高層

年賺5,100萬元嗰位係邊位?調查當然唔會玩開名。不過,會計師公會行政總裁丁偉銓就估計,呢位打工皇帝可能已經唔係財務總監,而係CEO(行政總裁)!

調查仲發現,當中23%喺上市公司擁有過百萬元年薪,同時,87%在港上市公司都有佢哋公會會員做公司高層或董事局成員。咁即係?即係證明會計師喺本港資本市場有好大影響力咁囉。

39%會員年搵逾60萬

絲絲成日聽到啲會計師呻工時長、仲要成日返內地出差舟車勞頓,但無論幾咁辛苦,一睇番佢哋份糧,就肯定大把人仍想加入呢行。

睇番公會舊年十一月至十二月做嘅調查,有39%會員年薪有60萬元或以上(除開即月入5萬元或以上);年薪達60萬至近90萬元(月入5萬至7.5萬元)嘅就有20%;年薪多過240萬元(月入多過20萬元)嘅都有2%。就算年薪少過60萬元(月入少過5萬元)嘅「低薪一族」(相對嚟講咋),都有好大部分年薪介乎30萬至近60萬元(即月入2.5萬至5萬元),難怪每年咁多人爭崩頭報讀大學會計系!

丁偉銓仲話,會計師可以涉獵好多行業,差唔多乜行業都可以做,就連特首都可以做!係喎,澳門前特首何厚鏵咪就係有會計師資格囉,眾所周知嘅喎,乜你唔知咩。

余絲韻