Market Insight：吉汽隨時升多浸

事實上，年初至今發達國家市場統統上揚，歐股（泛歐Euro Stoxx）升10.1%，日股升13.8%，反觀道指仲跌緊0.4%，標普五百指數亦升得1.2%，無疑聯儲局的決定，一睇市場接受程度，其次也是更重要的，是經濟與企業盈利以健康速度改善，也足以承受資金成本回升的壓力。

還原基本，加息標誌着對未來經濟前景的信心增強，一四年開始橫行無方向的美股，有機會在不明朗因素消除後追落後，惟新興市場會唔會享受到美股強勢的好處，尋日講過在下頗有保留。

自十月中進入抖氣期以來，港股靜幾日挾一日經已成為常態，美股做好，尋日港股裂口開高235點後，全日於高位徘徊，收市升311點，報22,500點，主板成交奀到唔夠七百億，尋日升市更似大戶趁通街淡友，藉期指好倉突襲的可能性較大。

配合市況掉轉玩

假如大市維持六、七百億元成交玩到年底，唔好講兩萬四，挑戰兩萬三都唔容易，月底前，又睇大戶點利用IMF確認人民幣加入SDR消息，將個市舞高弄低。

發改委降低非居民用天然氣門站價，意外地兩隻最正路的基金愛股新奧能源（02688）及中國燃氣（00384），開高後沽壓相當大，埋單僅升0.9%及0.6%，反而北京控股（00392）及港華燃氣（01083）兩隻半冷門跑出，分別升4.8%及4.6%。睇番新奧沽空金額佔成交43.4%，中燃更達46.2%，兩隻加埋沽空金額超過三億銀，多過後面兩隻一大截，解釋到何以股價反高潮。

今時唔同往日，以前趁好消息追貨，家陣個市日升日跌陰陰乾，大孖沙一見好消息，第一時間係趁高沽空，等跌食胡，一於掉轉頭嚟玩。

食正國策無得輸

吉利汽車（00175）高層放風，去到十一月，已經提早完成45萬架的全年銷量目標，估計埋單計數，銷量破半百萬問題唔大，咁都仲未夠，仲預告進軍電動車市場，啱啱上市的「帝豪EV」，售價22.88萬元人仔，經國家及地方政府補貼近一半，講緊大約12萬元人仔，公司估計半年內可以賣到1萬架，仲講到明性價比唔會比現有國產車款低，明顯針對住比亞迪（01211）。

電動車佔吉汽銷量1到2%，以事論事，發展電動車對業績即時幫助十分有限，惟國家要同污染開戰，瘋狂燒錢在全國城市大興土木，不斷建充電樁，似乎好大決心，一定要做到交通車輛減排。

反觀芬佬長時間得比亞迪一隻選擇，依家吉汽都插手電動車，會唔會溝淡比亞迪的高估值，好難講，但對估值唔高的吉汽來說，肯定多一塊靚靚的包裝紙，基金睇法肯定會唔同晒，如果破到月初高位4.33元，衝多浸上5元一啲都唔奇。

另外，國家體育局近日下發「關於進一步做好運動項目文化建設的通知」，要求進一步提高運動項目文化建設，以及轉變運動項目發展和辦賽思路。

至於重點措施，包括增加青少年參與運動教育項目、成立青年體育俱樂部、訓練中心、增強體育文化及競賽對社會的影響，並透過政策及財政支持及鼓勵中國傳統體育項目的推廣，估計內地體育用品股長線可以受惠於行業的發展。

體品股逢低收集

受消息帶動，體育用品股明顯呈強，安踏體育（02020）昨日創24.45元一年新高，最後收24.05元，升5.9%，李寧（02331）升4.2%，特步國際（01368）亦升3.7%，整個板塊表現強勁。

經過去庫存後，今年體品股的盈利已有起色，而安踏中期純利升兩成至9.7億元人民幣，表現較市場預期佳，而公司於一六年第二季度訂貨會中，安踏品牌產品的訂單金額按年錄得低雙位數升幅，是自一四年第一季度起連續十個季度錄得訂單增長，反映行業前景向好，相信在訂單增長理想帶動下，安踏盈利可保持良好增長勢頭，股價有機會持續做好，看官不妨逢低收集。

古勝