絲絲講場：富邦櫃員機「有偈傾」
絲絲都話咗，嚟緊係視像櫃員機嘅世界，前日係永隆部VTM，尋日輪到富邦香港推部i-Teller，稱呼雖然唔同，一樣都係可以做櫃台服務嘅視像櫃員機。
客服姐姐經特殊訓練
尋日絲絲去富邦灣仔皇后大道東分行試新嘢。服務固然係一流，撳錢唔想要大紙嘅話，可以直接同視像櫃員機入面個客戶服務員提出要求。絲絲望住個Mon，見阿客服姐姐何止有禮貌，仲人靚聲甜，又可以直接對話，連絲絲睇到都幾咁歡喜，想傾多幾句。連絲絲都咁，大把人比絲絲更得閒更無聊，絲絲有啲擔心客服姐姐畀人滋擾喎，點算？
富邦香港執行副總裁兼零售銀行部主管葉嘉敏拍心口話，唔驚。佢話客服姐姐個個都受過專業訓練，同分行嘅櫃台人員一樣，識得點控制客戶情緒，兼且仲會有同事喺身邊幫手咁話。
余絲韻