絲絲講場：o靚族揀銀行愛中港通
你用開邊間銀行嘅服務為主？金融業智庫RFi Group啱啱公布咗《2015年環球零售銀行業交叉銷售報告》，想知你同大部分港人有冇唔同？埋嚟睇過。
報告話，香港人主要用開嘅銀行第一位係滙豐，中銀香港同恒生就分別排第二同第三。個結果，絲絲都幾乎預咗。
不過，年輕一輩有另一套選擇。估吓18至24歲呢班生力軍最常用係邊間銀行？跑出嘅竟然係中資行中銀香港！恒生穩守第二，獅子行就只排第三。
25歲「定型」 Mark客趁早
究竟何解喺年輕人當中，中資行會撼贏本地銀行？RFi Group亞洲區總經理Gerald Ferguson話，可能因為近年好多內地人嚟香港讀書同做嘢，佢哋係喺內地用開中行嘅服務，所以嚟到香港都傾向揀番子行中銀香港，加上子母行之間匯款方便，所以帶動中銀香港榮登後生一族嘅龍頭大佬。
變幻原是永恒，話唔定呢班生力軍第日就貪新忘舊，遲下排名又大洗牌呢？Sorry喇，RFi Group顧問服務部董事總經理Alan Shields話，一般人喺25歲左右揀定主要銀行後，好少會再轉嚟轉去，預期中銀香港嘅市佔率未來10至15年仲會繼續增加。換言之，銀行Mark客要趁早。
學界之花用邊間？
Catherine - 中銀、滙豐
「入U時開咗中銀儲蓄戶口，因間銀行就喺U樓下，好方便，同埋嗰時銀行有做信用卡Promo。
滙豐戶口都有，係好多年前Daddy、Mommy幫我開落，做出糧戶口同埋搞學生資助。因為滙豐同恒生櫃員機通用，所以習慣喺呢個Account攞錢。」
Monita -中行與建行（內地用）、恒生（香港用）
「喺內地用開中國銀行、建設銀行戶口；舊年九月來港升學，就開咗個恒生存款戶口，仲申請埋恒生信用卡，因為恒生分行較近我，方便，兼且朋友都喺嗰度開。」
Christy - 恒生、創興、花旗
「入U時喺恒生開咗個綜合戶口，順便開埋信用卡，夠方便，總有一間恒生喺附近，大銀行有保障嘛！
3年前亦喺創興銀行開咗個活期戶口，嗰時開戶只需10蚊好抵，所以好多同學都開。但個戶口無得申請信用卡，投資又無優惠，所以唔多用。
仲有一個花旗綜合加投資戶口，專用嚟買股票！本來只係想要個股票戶口，點知一定要有綜合戶口先開得投資戶口，所以惟有開埋。用嚟做出糧戶口有得免手續費，都唔錯。」
余絲韻