絲絲講場：12％打工仔 Sick leave「射波」

友邦香港調查發現，打工仔平均每年請病假3.3日；舊年請過病假嘅，有12%認自己曾經「射波」，即係詐病請假。又估唔到大家咁坦白。

調查話詐病唔返工有四大原因，頭位係家庭問題，佔8%；不過，邊得咁多人有家庭問題，有2%人實情係去咗見工，亦有2%人係生日大晒而詐病請假！嗱嗱嗱，竟然有1%人係因為塞車遲到，索性唔返！！絲絲真係估佢哋唔到。

近九成人帶病返工

老細們咪嬲住，其實大部分人都好有責任心，近九成人都曾經帶病返工，主要係因為掛住工作，冇時間睇醫生。

老闆唔想員工「射波」見工？嗱，調查發現，無團體醫療福利嘅打工仔，為見工而「射波」比例係4%，相反有團體醫保福利嗰啲就只係得1%。識做啦。

講開又講，點解詐病偷懶唔返工叫「射波」？有人話係因為同「卸膊」差唔多音；又有人話源於大學簽到簿上，點名方格入面畫個圈代表缺席，方格似龍門，圓圈似個波，講講吓變「射波」。實情有冇人知「射波」點嚟？話畀絲絲吖。

余絲韻