絲絲講場：趙薇畀面敲鑼 進帳兩億
中國創意（08368）尋日上市，趙薇以基礎投資者（Cornerstone Investor）身份嚟撐場，皆因佢同主席楊劍係相識廿年嘅老友。趙薇仲「小燕子」調皮上身，敲咗幾下上市鑼。Cornerstone同主席一齊敲鑼已經少見，個鑼一次畀人敲咁多下就更少有。
乜嘢係「基礎投資者」？就咁嘅，啲新股為咗增加公眾對佢嘅信心，上市前會搵啲有分量嘅投資者「認投」相對大量嘅股份，呢啲認投嘅就叫「基礎投資者」，呢啲股份會有禁售期，一般最低消費鎖半年。趙薇今次認購咗5,400萬股中國創業，佔股權4.5%。
趙薇近年轉戰財金界，投資不知幾勁，上次減持阿里影業（01060）擸咗十億後，尋日隻中國創意收市價4蚊，比配售價0.39元高九倍，趙薇做一做Cornerstone，首日帳面已經勁賺兩億。究竟係咪有人畀貼士？趙薇話投資嘅嘢只問老公黃有龍。佢又呻以前只專注演戲，依家做埋投資又做導演，其實都幾攰喎。
楊劍語言藝術了得
佢老友楊劍，絲絲眼見，楊主席絕對有Artist潛質，事關佢語言藝術相當了得，仲廣東話同普通話不時轉台。大家好奇今次投資有冇預埋趙薇個Friend馬雲（梗係講緊阿里位壇主）一份？楊主席答「我們都是朋友」。咁識咗馬雲幾耐？佢重複多次「我們都是朋友」，又話馬雲咁嘅成功人士係佢偶像。咁馬化騰（即是騰訊位教主）呢？楊主席就答「一個馬就夠啦，你估買馬咩」。
講完馬到講波，問佢點睇香港對中國踢成0比0，佢呢頭話因為喺內地做嘢要撐中國隊，嗰頭又話因為喺香港上市要撐香港隊。勁！
余絲韻