孖妹積極慳錢之餘，亦想買吓股票做中、長線投資，幫資本增值，唔知又可以點揀呢？
新鴻基金融財富管理策略師溫傑建議，用「由上而下」嘅選股方法，從前景看俏嘅行業中發掘優質公司，估值有折讓就更好。
投資期為兩年嘅話，他建議揀波動較低嘅股份，當中較睇好恒生銀行（00011）同長和（00001）。佢話，兩隻股份過去一年嘅啤打系數（BETA）喺恒指成分股中處較低水平，同大市相關度較低。恒生今年底預測市帳率（P/B）只有約1.89倍，相對低嘅估值有望支持佢嘅股價表現；長和全球業務多元化，有助分散地區風險。
至於要買入股票作十年期投資，他就較睇好港交所（00388），因滬港通、深港通、倫港通等措施有望提升港股成交，有利港交所。
另一方面，冇時間做研究嘅話，可以買入唔同國家地區嘅ETF（交易所買賣基金）或者基金，好似盈富基金（02800），追求同大市同步嘅回報。