絲絲講場：滙控大換血有景轟
歡迎大家又揭到呢一版，不過《絲絲講場》同平日有啲啲唔同，絲絲今日係「人事部主任」，Update吓財經圈最新嘅人事變動升遷。話時話，咁絲絲叫做升咗定降咗級呢可。
似為下任主席鋪路
要講，就首先講滙豐控股（00005），事關佢哋今期嘅董事局變更，可以話係最最最惹人揣測嘅人事變動。
滙控尋日宣布董事會有人事變更，做咗非執董10年嘅駱耀文（Simon Robertson）同12年嘅方安蘭（Rona Fairhead）下年退休，集團已經委任卡斯特（Henri de Castries）同華爾士（Paul Walsh）接任。
消息引發市場無限想像，事關英國《天空新聞》之前爆料，滙控已經為下任外聘主席鋪路，指示獵頭公司物色「具備擔當主席能力」嘅非執董。唔通講緊Henri或者Paul？
金融酒業猛人入局
Henri係AXA安盛CEO兼主席，有豐富金融經驗；而Paul就睇開餐飲，係英國餐飲集團Compass主席，之前擔任國際知名酒業Diageo CEO；兩位各有各強項。不過，尋日又有風聲話，今次董事會變更只係恒常變動！
咁即係點？都話咗係最最最惹人揣測嘅董事變局，亂世係咁。
不過有樣嘢絲絲可以肯定，以後股東大會無咗Simon一定冇咁精彩，Simon一向敢言，完全唔怕同小股東撐到行，今年先喺股東大會力保集團主席同CEO，火藥味重到呢，第時見唔到嚕。等等，補多句，服務咗董事會近8年嘅凱芝（Safra Catz）亦會喺年底卸任。
余絲韻